Հունան Ավետիսյանի ֆուտբոլի հուշամրցաշարում կայացան հերթական հանդիպումները: Արարատի «Այգ» մարզաբազայում, որտեղ ուսումնամարզական հավաք է անցկացնում «Փյունիկ-2»-ը, փյունիկցիները մրցեցին «Դինամոյի» հետ: Խաղն ավարտվեց «Փյունիկ-2»-ի հաղթանակովՙ 2-1: Իսկ Արմավիրի «Հոբելյանական» մարզադաշտում ուժերը չափեցին «Կիլիկիան» ու «Բանանց-2»-ը: Գրանցվեց ոչ-ոքիՙ 1-1: Ինչպես նշել էինք նախորդ համարում, հուշամրցաշարի մեկնարկային տուրում չէր կայացել «Շիրակ»-«Երեւան յունայթեդ» հանդիպումը: «Երեւան յունայթեդը» ֆինանսական խնդիրներ ուներ, որի պատճառով չէր կարողացել վճարել առաջնության եւ գավաթի մասնակցության մուտքավճարը: Երեկ հայտնի դարձավ, որ կայացել է թիմի ընդհանոր ժողովը, որում հայտարարվել է ակումբի լուծարման մասին:
Ֆուտբոլասերներին հիշեցնենք, որ «Երեւան յունայթեդը» 2005 թ. հիմնադրել էր Ավստրալիայից լիբանանահայ Տիգրան Հովիվյանը: Այդ տարի թիմը հանդես եկավ Հայաստանի առաջնության 1-ին խմբում: Թիմի հանդիպումները «Հանրապետական» մարզադաշտում ուղեկցվում էին համերգներով: Բայց մրցաշրջանի ավարտից հետո թիմը փաստորեն կազմալուծվեց: Մեկամյա ընդմիջումից հետո Տիգրան Հովիվյանը կրկին ձեռնամուխ էր եղել «Երեւան Յունայթեդի» վերակազմավորմանը: Ալբերտ Սարգսյանի գլխավորությամբ թիմը մոտ երկու ամիս մարզվեց, ստուգողական հանդիպումներ անցկացրեց, սակայն ինչպես պարզվեց, ամեն ինչ ապարդյուն էր:
Այսպիսով, հուշամրցաշարի 1-ին խմբում մնաց երեք թիմ: Խմբում իր անդրանիկ հանդիպումն անցկացրեց Գյումրիի «Շիրակը», որը հյուրընկալել էր «Արարատ-2»-ին: Երիտասարդ արարատցիները լուրջ դիմադրություն ցույց տվեցին փորձառու շիրակցիներին: Վերջիններիս ոչ մի կերպ չէր հաջողվում լրջորեն սպառնալ մրցակցի դարպասին, որը բավական հստակ պաշտպանվում էր եւ վտանգավոր հակագրոհում: Թվում էր, թե այդ խաղում այլեւս գոլ չի գրանցվի եւ դարպասները կմնան անառիկ: Սակայն խաղի վերջին րոպեին անկյունայինի խաղարկումից հետո արարատցիները սեփական տուգանային հրապարակում խախտեցին կանոնները եւ շիրակցի Կարեն Խաչատրյանը հստակորեն իրացրեց 11 մ հարվածը: «Շիրակը» հաղթեց 1-0 հաշվով: Այսօր «Շիրակը» կմրցի «Ուլիսի» հետ, որը մեկնարկային խաղում 3-0 հաշվով հաղթել էր «Արարատ-2»-ին: Եզրափակիչ դուրս գալու համար «Շիրակին» միայն հաղթանակ է անհրաժեշտ, իսկ «Ուլիսին» բավարարում է նույնիսկ ոչ-ոքի արդյունքը:
ԱՇՈՏ ՀԱՅՐԱՊԵՏՅԱՆ