«ԱԶԳ» ՕՐԱԹԵՐԹ

ՀԱՅԱՍՏԱՆԻ ՀԱՎԱՔԱԿԱՆԸ ՊԱՀՊԱՆԵԼ Է ԴԻՐՔԸ

Ֆուտբոլի աշխարհի ներկայիս չեմպիոն Իտալիայի հավաքականին ընդամենը մեկ ամիս էր վիճակված գլխավորելու ՖԻՖԱ-ի դասակարգման ցուցակը: Մարտի 14-ին հրապարակված դասակարգման նոր ցուցակի առաջատարի դերն ստանձնել է Արգենտինայի հավաքականը, որին հաջողվել է նախորդ ամսվա համեմատ երկու հորիզոնական վեր բարձրանալՙ շրջանցելով Բրազիլիայի եւ Իտալիայի ընտրանիներին: Իսկ աշխարհի հնգակի չեմպիոններ բրազիլացիները, որ երկար տարիներ գլխավորում էին ՖԻՖԱ-ի դասակարգման ցուցակը, եւս մեկ հորիզոնականով նահանջեցին եւ այժմ 3-րդ տեղում են:

Ինչ վերաբերում է Հայաստանի ազգային հավաքականին, ապա մեր ընտրանին պահպանել է դիրքը ցուցակումՙ զբաղեցնելով 119-րդ հորիզոնականը: Ընդ որում, մեկ միավորով մեր հավաքականի վարկանիշն աճել է: Ընտրական մրցաշարում ՀՀ հավաքականի առաջիկա մրցակից Լեհաստանի ընտրանին մեկ հորիզոնականով նահանջել է եւ այժմ 24-րդ տեղում է:

Ընտրական մրցաշարում Հայաստանի հավաքականի մրցակիցներից ամենաբարձր վարկանիշն ունեն պորտուգալացիները: Նրանք պահպանել են դիրքը 8-րդ հորիզոնականում: Ամենամեծ առաջընթացն ունեցել են ֆինները, որոնք 15 հորիզոնական բարձրացել են եւ զբաղեցրել 33-րդ տեղը: 7 տեղով առաջադիմել են ադրբեջանցիները (123-րդ տեղ), 2-ովՙ ղազախները (143-րդ), մեկովՙ սերբերը (28-րդ): Միայն բելգիացիներն են նահանջ ապրել 3 հորիզոնականովՙ զբաղեցնելով 56-րդ տեղը:

ՖԻՖԱ-ի դասակարգման ցուցակի 207 երկրների հավաքականներից ամենամեծ առաջընթացն ունեցել է Պանամայի ընտրանին, որը 20 հորիզոնականով վեր է բարձրացել: 11 տեղով առաջադիմել է Նիկարագուայի ընտրանին: Իսկ ահա Կանադայի հավաքականը 16 տեղով նահանջել է: 13 հորիզոնականով նահանջել է Սալվադորի հավաքականը, 11-ովՙ մոլդովացիները: Անփոփոխ է մնացել լավագույն տասնյակի կազմը, որի ներսում տեղաշարժը վերաբերում է միայն առաջին եռյակին:

Ներկայացնում ենք լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:

ԱՇՈՏ ՀԱՅՐԱՊԵՏՅԱՆ