«ԱԶԳ» ՕՐԱԹԵՐԹ

https://www.azg.am | WAP | WAP-CULTURE

#46, 2007-03-14 | #47, 2007-03-15 | #48, 2007-03-16


ԵՐԵՎԱՆԻ ԷԼԻՏԱՐ ՇԵՆՔԵՐԸ ՄՇՏԱԿԱՆ ԲՆԱԿԻՉՆԵՐ ՉԵՆ ՈՒՆԵՆԱ

Խորհրդարանում էկոլոգիայով զբաղվող անգամ մի պատգամավոր չկա

Երեկ Մամուլի ազգային ակումբում բնապահպանական տարբեր կազմակերպությունների ներկայացուցիչները ԱԺ պատգամավոր Թաթուլ Մանասերյանի հետ սովորական հերթական ահազանգն էին հնչեցնում բնապահպանական աղետալի վիճակի մասին: Քննարկման տրամաբանությունից եթե դատենք, Հայաստանում ոչ միայն բնապահպանական անհուսալի վիճակ է առաջացել, այլեւ հուսահատեցնող է դրանց լուծմանը կոչված իշխանությունների վերաբերմունքն այս խնդիրների հանդեպ: Բավական է ասել, որ խորհրդարանում էկոլոգիական հարցերով լրջորեն կամ գոնե (ժամանակ առ ժամանակ) զբաղվող ոչ մի պատգամավոր չկա: Տնտեսագետ Թաթուլ Մանասերյանն ասում է, որ օրենք ընդունողների մեծ մասը հենց իրենք ծառ կտրողներն են, եւ այդ պատճառով է, որ ավերված կանաչապատ հատվածների համար ոչ ոք պատասխանատվություն չի կրում: Եվ բացի այդ, եթե նույնիսկ օրենքը կատարյալ է, կառավարությունը սովորաբար այնպիսի որոշումներ է ընդունում, որ այն շրջանցելու սողանցքներ են լինում: Իսկ այսպիսի խնդիրների համար անկեղծորեն ցավող պատգամավորների անզորության ապացույցը խորհրդարանի դիմացի Պուշկինի այգին է, որ արդեն քանի տարի հոշոտվում է խորհրդարանի դեմ ու դեմ:

Տնտեսագետը կարծում է, որ տնտեսական վայրի մրցակցության զոհ դարձած բնությունը եթե իսկապես ուզում ենք պաշտպանել, հասարակական կազմակերպություններն ու հասարակությունը պահանջատիրական այնպիսի կեցվածք պիտի ցուցաբերեն, ինչպես Շիկահողի փրկության ժամանակ էր: Թե չէ տարանջատ պայքարըՙ մասնագետները մի կողմից, հասարակական կազմակերպությունները` մյուս կողմից կամ բնակիչների տարերային բողոքները ոչ մի արդյունք չեն տա: Իշխանությունների հակասական վարքագծի մասին է շեշտադրում նաեւ «Հանուն մարդկային կայուն զարգացման» ասոցիացիայի նախագահ Կարինե Դանիելյանը: Մի կողմից քաղաքապետարանը ծառատունկերի ծրագրեր է իրականացնում, տարեկան 40-60 հազար ծառեր ու թփեր տնկելով, համաքաղաքային շաբաթօրյակներ կազմակերպելով, մյուս կողմից հանդուրժում է ծառ ու կանաչի հոշոտումը: Իհարկե, հպարտանում ենք Երեւանը համակած կառուցապատման տենդով, բայց ինչպես արդարացի նկատեց ակադեմիկոս Լիա Օսիպյանը, մայրաքաղաքի կենտրոնի կանաչը կլանած «էլիտար» շենքերը մշտական բնակիչներ երբեք չեն ունենա: Դրանց տերերը երեւի կգան միայն կարճ ժամանակով վայելելու իրենց էլիտար բնակարանների ճոխությունը, որովհետեւ հատկապես ամռանը նրանք շնչահեղձ կլինեն թթվածնի պակասից, ասֆալտի, բետոնի տապից, փոխադրամիջոցների աղմուկից ու առատ արտանետումներից:

Կենսաբանական գիտությունների դոկտոր-պրոֆեսոր Գոհար Օգանեզովան պսակազերծ է անում քաղաքապետարանի բնապահպանական վարչության պետի վերջերս արած հայտարարությունը, թե Երեւանի կենտրոնում մեկ բնակչին ընկնող կանաչի մակերեսը հնարավոր կլինի ապահովել ուղղաձիգ կանաչապատման միջոցով, այսինքնՙ շենքերի վրա մագլցող բույսեր աճեցնելով: Մասնագետի բացատրությամբ արմատային թույլ համակարգով, սաղարթներ չտվող մագլցող բույսերը երբեք չեն կարող փոխարինել բնական տարածքում կատարված կանաչապատումներին: Մի խոսքով, կանաչապատման բոլոր ծրագրերը ֆիկցիաներ են, ձեւական ակցիաներ, քանի որ կատարվում են խախտելով ճարտարապետական կանաչապատումների սկզբունքները, հարմարեցնելով դրանք բիզնեսի շահերին եւ ոչ թե հակառակը: Դրա համար էլ այդքան տարածված են Երեւանի պես փակ շնչառությամբ քաղաքներին հատուկ ախտերը` ասթմաներն ու ալերգիաները:

ԿԱՐԻՆԵ ԴԱՆԻԵԼՅԱՆ


© AZG Daily & MV, 2009, 2011, 2012, 2013 ver. 1.4