Ֆուտբոլի Եվրոպայի առաջնության ընտրական մրցաշարի վերջին հանդիպումների արդյունքներն իրենց անմիջական արտացոլումն են գտել ՖԻՖԱ-ի դասակարգման նոր ցուցակում ազգային հավաքականների ցուցանիշներում: Լեհերից կրած պարտությունից հետո Հայաստանի ազգային հավաքականը նախորդ ամսվա համեմատ դասակարգման ցուցակում 8 տեղով նահանջել է, վարկանիշը նվազեցրել 26-ով եւ այժմ զբաղեցնում է 127-րդ հորիզոնականը: Իսկ ահա ընտրական մրցաշարում Հայաստանի հավաքականի մրցակիցներ Ադրբեջանի եւ Ղազախստանի ընտրանիները բավական առաջադիմել են շնորհիվ վերջին հանդիպումներում տոնած հաղթանակների: Այսպես, ղազախները 27 հորիզոնականով առաջադիմել են եւ զբաղեցնում են 116-րդ տեղը: Իսկ ադրբեջանցիները 20 տեղով են վեր բարձրացել եւ այժմ 103-րդ տեղում են: Հարկ է նշել, որ ամենամեծ առաջընթացը գրանցվել է Լիխտենշտեյնի հավաքականի մոտ (31 տեղով):
Ընտրական «A» խմբում հանդես եկող հավաքականներից ամենաբարձր վարկանիշն ունեն պորտուգալացիները, որոնք մեկ տեղով բարձրացել են եւ զբաղեցնում են 7-րդ հորիզոնականը: Լեհերն էլ մեր հավաքականին հաղթելու շնորհիվ 3 տեղով բարձրացել են եւ զբաղեցնում են 21-րդ հորիզոնականը: Իսկ ահա ֆինները 12 տեղով նահանջել ենՙ տեղ զբաղեցնելով 45-րդ հորիզոնականում: 4 հորիզոնականով նահանջել են սերբերը (32-րդ տեղ) եւ բելգիացիները (59-րդ տեղ):
Մեկամսյա ընդմիջումից հետո աշխարհի չեմպիոն Իտալիայի հավաքականը կրկին գլխավորեց դասակարգման ցուցակը: Իտալացիներն իրենց վարկանիշն ավելացրել են 12-ով, մինչդեռ 2-րդ հորիզոնական նահանջած արգենտինացիներն իրենց ցուցանիշը նվազեցրել են 22-ով: Լավագույն տասնյակում 2 հորիզոնականով նահանջել է Անգլիայի ընտրանին, մեկ տեղովՙ Չեխիայի հավաքականը: Իսկ ահա հոլանդացիները, պորտուգալացիներն ու իսպանացիները մեկ տեղով բարձրացել են:
Նախկին ԽՍՀՄ հանրապետությունների հավաքականներից ամենաբարձր վարկանիշն ունեն ուկրաինացիները (1021), որոնք 11-րդ տեղում են: Բավական առաջադիմել են ռուսներըՙ 23-րդ տեղից բարձրանալով 16-րդ հորիզոնական: Դասակարգման ցուցակում ամենամեծ նահանջն ունեցել է Բանգլադեշի հավաքականը (21 տեղով):
Ներկայացնում ենք դասակարգման ցուցակի առաջին տասնյակի եւ նախկին ԽՍՀՄ հանրապետությունների հավաքականների ցուցանիշները:
| 1. Իտալիա | 1604 |
| 2. Արգենտինա | 1594 |
| 3. Բրազիլիա | 1520 |
| 4. Ֆրանսիա | 1496 |
| 5. Գերմանիա | 1393 |
| 6. Հոլանդիա | 1302 |
| 7. Պորտուգալիա | 1292 |
| 8. Անգլիա | 1278 |
| 9. Իսպանիա | 1237 |
| 10. Չեխիա | 1169 |
| 11. Ուկրաինա | 1021 |
| 16. Ռուսաստան | 901 |
| 60. Ուզբեկստան | 511 |
| 63. Բելառուս | 475 |
| 85. Վրաստան | 374 |
| 89. Լիտվա | 356 |
| 92. Մոլդովա | 345 |
| 103. Ադրբեջան | 298 |
| 104. Լատվիա | 297 |
| 110. Էստոնիա | 247 |
| 116. Ղազախստան | 235 |
| 127. Հայաստան | 184 |
| 145. Տաջիկստան | 122 |
| 151. Ղրղզըստան | 108 |
| 163. Թուրքմենստան | 76 |
ԱՇՈՏ ՀԱՅՐԱՊԵՏՅԱՆ