31-ամյա Լեւոն Գուլյանի մահվան հանգամանքների արդարացի հետաքննություն կազմակերպելու պահանջով «Ազգի» կայքէջում անցկացված ստորագրահավաքին 3 օրում մասնակցեց 140 մարդ: Հիշեցնենք, որ հանգուցյալի հարազատները չեն հավատում պաշտոնական վարկածին, թե Գուլյանը պատուհանից նետվելով ինքնասպան է եղել, եւ պնդում են, որ նրան սպանել են խոշտանգումներից հետո: Ստորագրահավաքի մասնակիցները սփյուռքի (Բելգիա, Նիդեռլանդներ, Ռուսաստան, ԱՄՆ) ուսանողներ են, լրագրողներ, տնտեսագետներ, համակարգչային մասնագետներ, ինժեներներ, միջազգային կազմակերպությունների ներկայացուցիչներ, իրավաբաններ ու ֆիզիկոսներ: Կատարված ողբերգությանը նրանց արձագանքը միայն հաստատում է այն ցավալի փաստը, որ մեր հասարակության մեջ իրավապահները խիստ աննպաստ համարում ունեն: «Մենք Ռուսաստանում սքինհեդներից այնքան չենք վախենում, որքան Հայաստանում` ոստիկաններից», գրում է Ռազմիկը Տոլյատիից:
Հոկտեմբերի 27-ի գործով հայտնի, լրագրող, սոցիոլոգ Նաիրի Բադալյանը (ԱՄՆ) ստորագրել է այսպես` «Հայաստանի ոստիկանության խոշտանգումների մեքենայի ճանկերից հրաշքով դուրս պրծած»:
Մասնակիցների մեծամասնությունը կոչ է անում Գուլյանի հարազատներին չհուսահատվել եւ չդադարեցնել պայքարը ճշմարտությունը բացահայտելու համար:
Այսօր, ժամը 18-00-ին, ՀՀ մարդու իրավունքների պաշտպանի գրասենյակում (Պուշկինի 56ա, 2-րդ հարկ) տեղի կունենա համատեղ մամուլի ասուլիս:
Մամուլի ասուլիսին կմասնակցի Դանիական IRCT (International Rehabilitation Council for Torture Victims) կազմակերպության ուղարկած երեք անկախ դատաբժշկական փորձագետներից կազմված հանձնաժողովը, որը կհրապարակի Լեւոն Գուլյանի դիակի երկրորդ դատաբժշկական փորձաքննության նախնական արդյունքները:
ԿԱՐԻՆԵ ԴԱՆԻԵԼՅԱՆ