Ֆուտբոլի Հայաստանի բարձրագույն խմբի առաջնության 9-րդ տուրում մեծ հետաքրքրությամբ էր սպասվում մրցաշարային աղյուսակի առաջին երկու հորիզոնականներում գտնվող «Փյունիկի» եւ «Բանանցի» մրցավեճը: Սակայն սպասված համառ մրցակցությունը չստացվեց: Երկրի չեմպիոնն այդ խաղում բոլոր առումներով գերազանցեց մրցակցին, տոնելով խոշոր (5-1) հաշվով հաղթանակ:
Հանդիպման սկիզբը բավական արդյունավետ ստացվեց: Խաղասկզբից դեռ չէր անցել 10 րոպե, երբ մրցակիցներն արդեն երեք անգամ գրավել էին դարպասները: 6-րդ րոպեին հաշիվը բացեց փյունիկցի Հենրիխ Մխիթարյանը: 3 րոպե անց գրոհին միացած «Բանանցի» պաշտպան Բուրդիյանը կարող էր հավասարեցնել հաշիվը, սակայն նրա հարվածը դիպավ դարպասի հորիզոնական ձողին: Իսկ ահա «Փյունիկի» հակագրոհը հաջողությամբ պսակվեց: Ռաֆայել Նազարյանը կրկնապատկեց հաշիվը: Ճիշտ է, 1 րոպե անց «Բանանցի» ավագ Եղիշե Մելիքյանը կրճատեց հաշվի տարբերությունը, սակայն հետագայում «Փյունիկը» կարողացավ իրացնել առավելությունը: Դեռեւս առաջին խաղակեսում Գեւորգ Ղազարյանը երրորդ անգամ գրավեց Ռադաջայի դարպասը: Ընդմիջումից հետո էլ «Փյունիկից» աչքի ընկան Լեւոն Փաչաջյանն ու Սարգիս Հովսեփյանը, որն իրացրեց 11 մ հարվածը:
Արդյունավետ խաղով աչքի ընկավ նաեւ Երեւանի «Արարատը», որը հյուրընկալվելիս 4 անպատասխան գնդակ խփեց «Կիլիկիայի» դարպասը: Արարատցիներից 2-ական գոլ խփեցին բրազիլացի Մարկոսը եւ Սարգիս Մովսիսյանը:
Գյումրիում «Շիրակի» ֆուտբոլիստները խաղավարտից 3 րոպե առաջ Տիգրան Հովհաննիսյանի խփած միակ գոլի շնորհիվ հաղթեցին «Միկային»: Իսկ Կապանում «Գանձասարի» եւ «Ուլիսի» մրցավեճում հաշիվն այդպես էլ չբացվեց:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 9 | 7 | 1 | 1 | 22-5 | 22 |
| 2. Արարատ | 9 | 6 | 1 | 2 | 15-2 | 19 |
| 3. Բանանց | 9 | 5 | 2 | 2 | 13-8 | 17 |
| 4. Միկա | 9 | 5 | 1 | 3 | 18-10 | 16 |
| 5. Շիրակ | 9 | 3 | 2 | 4 | 6-9 | 11 |
| 6. Գանձասար | 9 | 2 | 3 | 4 | 5-6 | 9 |
| 7. Ուլիս | 9 | 1 | 1 | 7 | 3-22 | 4 |
| 8. Կիլիկիա | 9 | 1 | 1 | 7 | 3-23 | 4 |
Ռմբարկուները
| Մարկոս | «Արարատ» | 9 |
| Գեւորգ Ղազարյան | «Փյունիկ» | 5 |
ԱՇՈՏ ՀԱՅՐԱՊԵՏՅԱՆ