Հունաստանի նախագահն այցելեց հայկական մշակույթի եւ հոգեւոր կենտրոններ
Հանրապետության նախագահ Ռոբերտ Քոչարյանի հրավերով պետական այցով Հայաստանում գտնվող Հունաստանի նախագահ Կարոլոս Պապուլիասի գլխավորած պատվիրակությունը երեկ` վաղ առավոտյան այցելեց Մատենադարան` հայոց հին ձեռագրերի գիտահետազոտական ինստիտուտ: Հայ հին ձեռագրերի մեր անգին գրապահոցը արժանացավ նաեւ հույների հետաքրքրությանն ու հիացմունքին: Մատենադարանի տնօրեն Սեն Արեւշատյանն ամփոփ ներկայացնում էր հայ գրերի ստեղծման նախապատմությունը, մաշտոցյան շրջանն ու դրան հաջորդած ժամանակաշրջանները` կանգ առնելով արժեքավոր, հին եւ շատ տպավորիչ ձեռագրերի վրա:
Հույներին խիստ հուզեց Մատենադարանի հարուստ ֆոնդում հունարենից թարգմանված ոչ պակաս արժեքավոր աշխատանքներ տեսնելը, որոնցից շատերի բնագրերն անգամ չկան:
Մատենադարանից հեռանալիս Հունաստանի նախագահ Կարոլոս Պապուլիասը Սեն Արեւշատյանից որպես նվեր հայկական մանրանկարչության գիրք ստացավ: Հին ձեռագրերի գիտահետազոտական ինստիտուտի տնօրենին ուղղված շնորհակալական խոսքում հույն ղեկավարը երախտագիտություն հայտնեց ձեռագրերի թանգարանին, որոնց շնորհիվ փրկվել են նաեւ հունական փիլիսոփայական, պատմական եւ աշխարհագրական գործեր: Կարոլոս Պապուլիասը թողեց նաեւ իր տպավորությունները թանգարանի հուշերի մատյանում:
Կարոլոս Պապուլիասի, տիկնոջ` Մեյ Պապուլիասի եւ հունական մեծաթիվ պատվիրակությանը երեկ ընդունեց նաեւ Ամենայն հայոց կաթողիկոս Գարեգին Երկրորդը: Հունական պատվիրակությանն ուղեկցել է Հայաստանի տարածքային կառավարման նախարար, փոխվարչապետ Հովիկ Աբրահամյանը: Գոհունակություն հայտնելով երկու երկրների մետրմական հարաբերություններից` Ամենայն հայոց կաթողիկոսն անդրադարձել է Հայ առաքելական եւ Հույն ուղղափառ եկեղեցիների ջերմ հարաբերություններին` վերհիշելով իր հանդիպումները տիեզերական պատրիարք Բարդուղիմեոս Ա-ի, Աթենքի ու Հունաստանի արքեպիսկոպոս Քրիստոդուլոսի հետ, ինչպես նաեւ 2001 թ. տիեզերական պատրիարքի այցը Հայաստան: Մայր աթոռ Սբ. Էջմիածնի տեղեկատվական համակարգի տրամադրած տեղեկության համաձայն, Նորին սրբությունն արձանագրել է նաեւ, որ Հունաստանի իշխանությունների շնորհիվ ամեն տարի Մայր աթոռի միաբաններին տրամադրվում է երկու կրթաթոշակ` հոգեւոր ուսումնառությունը Հունաստանի կրթական բարձրագույն հոգեւոր հաստատությունում շարունակելու համար:
«Թե' հայ եւ թե' հույն եկեղեցիները պատմության ընթացքին պայքարեցին մեր բարձր իդեալների համար` ի խնդիր հավատի: Ինչ պիտի լիներ մեր ժողովուրդների ապագան առանց մեր եկեղեցիների», նշել է Հունաստանի նախագահ Կարոլոս Պապուլիասն` անդրադառնալով եկեղեցիների կարեւոր դերակատարությանը երկու ժողովուրդների կյանքում:
Պետական եռօրյա այցով Հայաստանում գտնվող հունական պատվիրակությունը` նախագահ Կարոլոս Պապուլիասի գլխավորությամբ երեկ մեկնեց Հայաստանից: Հիշեցնենք, որ հունական պատվիրակության կազմում Հայաստանում էին նաեւ Հունաստանի արտաքին գործերի փոխնախարար Թեոդորոս Կասսիմիսը եւ պաշտպանության փոխնախարար Իոաննիս Լաբրոպուլոսը: Այցի շրջանակներում Հունաստանի նախագահին եւ պատվիրակությանն ընդունել էր հանրապետության ղեկավար Ռոբերտ Քոչարյանը, վարչապետ Սերժ Սարգսյանն ու հայ այլ պաշտոնյաներ:
ԳՈՀԱՐ ԳԵՎՈՐԳՅԱՆ