Արատ Դինքը, Սենիկ Սերոբյանը, Կարին Կարակաշլին, Այդին Էնգինը, «Ակօս» թերթի անձնակազմը, Էրդալ Դողալը, Դինքի ընտանիքի փաստաբանը մեղադրվում են Թուրքիայի քրեական օրենսգրքի` «թուրքերի ինքնությունը վիրավորելու» համար պատասխանատվություն նախատեսող 301 հոդվածով: Նրանցից ոմանք կարող են ենթարկվել մինչեւ երեք տարի ազատազրկման: http://protest.keghart.com այս կայքէջում տեղադրված է նամակ` ի պաշտպանություն այն մարդկանց, ովքեր մեղադրվում են 301 հոդվածով, ինչպես նաեւ ընդդեմ թուրքական իշխանությունների` Հայոց ցեղասպանության մասին բարձրաձայնումները այդ հոդվածով պատժելու փորձերի: Ակցիայի նախաձեռնողների ներկայացմամբ, կայքէջում տարբեր այցելուների ստորագրություններով «Բողոքի բաց նամակը» կուղարկվի գրողների միջազգային «International PEN» կազմակերպությանը, որ աշխարհում հայտնի է նաեւ որպես կարծիքի ազատ արտահայտման պաշտպան: Տեղեկացնենք, որ Հրանտ Դինքի սպանությանՙ ներկայումս Թուրքիայում ընթացող դատավարությունը մեծ աղմուկ է հարուցել, եւ մասնավորապես հայտնի Human Rights Watch իրավապաշտպան կազմակերպությունը հայտարարել է գործընթացին ամենայն ուշադրությամբ հետեւելու մասին:
ԱՂԱՎՆԻ ՀԱՐՈՒԹՅՈՒՆՅԱՆ