«ԱԶԳ» ՕՐԱԹԵՐԹ

ՀՀ ՀԱՎԱՔԱԿԱՆԻ ԱՌԱՋԸՆԹԱՑԸ ՇԱՐՈՒՆԱԿՎՈՒՄ Է

ՖԻՖԱ-ն հրապարակել է ազգային հավաքականների վարկանիշային հերթական ցանկը հուլիսի 18-ի դրությամբ: Հայաստանի ազգային հավաքականը, որ հունիսի դասակարգման ցուցակում պարզապես ռեկորդային ցատկ էր կատարելՙ 128-րդ տեղից տեղափոխվելով 80-րդ հորիզոնական, եւս մեկ տեղով առաջադիմել է: Համեմատության համար նշենք, որ մեր ընտրանին 2006 թ. հուլիսի դասակարգման ցուցակում 105-րդն էր: Օգոստոսին մեր հավաքականը մեկ հորիզոնական բարձրացել էր, այնուհետեւ սկսվել էր նահանջը (112-րդ, 119-րդ, 124-ր տեղեր): Դեկտեմբերին եւ հունվարին մեր ընտրանին 123-րդ տեղում էր, ապա հաջորդ երկու ամիսներին հանգրվանեց 119-րդ հորիզոնականում: Այնուհետեւ կրկին սկսվեց նահանջը: Ապրիլին մեր ֆուտբոլիստները նահանջեցին 8 հորիզոնականով, իսկ մայիսին հայտնվեցին 128-րդ տեղում: Եվ ահա Ղազախստանի ու Լեհաստանի հավաքականների նկատմամբ տոնած հաղթանակների շնորհիվ մեր ընտրանին առայժմ բռնել է վերելքի ուղին:

Հնգամսյա ընդմիջումից հետո դասակարգման ցուցակը կրկին գլխավորեց Բրազիլիայի ընտրանին: Բրազիլացիներն առաջատարի դիրքը կորցրել էին փետրվարինՙ առաջին հորիզոնականը զիջելով իտալացիներին: Մարտին վերջիններիս գահընկեց արեցին արգենտինացիները, սակայն նրանց չհաջողվեց ամրապնդվել առաջին հորիզոնականում: Վերջին երեք ամիսներին աշխարհի չեմպիոն Իտալիայի հավաքականը կրկին ստանձնել էր առաջատարի դերը:

Լավագույն տասնյակի կազմում երկու փոփոխություն է կատարվել: Ուժեղագույնների կազմում ընդգրկվել են Մեքսիկայի ընտրանին, որն օրերս ավարտված Ամերիկայի գավաթի խաղարկությունում զբաղեցրել էր մրցանակային 3-րդ տեղը, եւ Խորվաթիայի հավաքականը, որոնք տասնյակում փոխարինել են չեխերին ու անգլիացիներին: Զգալի փոփոխություններ են կատարվել տասնյակի ներսում:

Եվրո-2008-ի ընտրական մրցաշարում Հայաստանի հավաքականի մրցակիցներից ամենաբարձր վարկանիշն ունի Պորտուգալիայի ընտրանին, որը 2 տեղով նահանջել է եւ այժմ 8-րդ հորիզոնականն է զբաղեցնում: 17-րդ տեղում սերբերն են (առաջընթաց 5 տեղով), լեհերը նահանջել են 21-րդ հորիզոնական (-3): Ֆինները մեկ հորիզոնական բարձրացել են (41-րդ տեղ): Նույնպիսի առաջընթաց է ունեցել Բելգիայի ընտրանին, որը 70-րդ տեղում է: Ադրբեջանցիները պահպանել են դիրքը 109-րդ տեղում, իսկ ղազախները մեկ հորիզոնականով բարձրացել եւ հանգրվանել են 118-րդ տեղում:

Ներկայացնում ենք դասակարգման ցուցակի լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները (փակագծում նշված է տեղը նախորդ ցուցակում):

ԱՇՈՏ ՀԱՅՐԱՊԵՏՅԱՆ