Ավարտվեցին Չեմպիոնների լիգայի որակավորման առաջին փուլի եւ ՈՒԵՖԱ-ի գավաթի խաղարկության ընտրական առաջին փուլի առաջին հանդիպումները: Վերջինը հայաստանյան թիմերից մրցավեճն ավարտեց Աշտարակի «Միկան», որը Բուդապեշտում ուժերը չափեց հունգարական ՄՏԿ-ի հետ: Մեր թիմը մրցակցին զիջեց նվազագույն` 1-2 հաշվով: Այդ խաղում հաշիվը 20-րդ րոպեին բացել է Ադամ Պինտերը: Առաջին խաղակեսի ավարտին «Միկայից» Կլեբեր Լուիս Ռոդրիգեսին հաջողվել է վերականգնել հավասարակշռությունը: 56-րդ րոպեին գեղեցիկ գոլի հեղինակ է դարձել Գաբոր Ուրբանը: Արագորեն շրջանցելով պաշտպանին, նա գնդակն ուղարկել է դարպասի ներքեւի ձախ անկյունը: «Միկան» եւս ունեցել է դարպասը գրավելու լավ պահեր, սակայն չի օգտագործել: Իր հերթին ՄՏԿ-ն կարող էր ավելացված ժամանակում 3-րդ գոլը խփել, սակայն Լեւենտ Հորվաթի 11 մ հարվածից հետո գնդակը դիպչել է դարպասի հորիզոնական ձողին:
Ամփոփելով Եվրոգավաթների հերթական խաղարկության մեկնարկում հայաստանյան թիմերի մրցելույթները, հարկ է ընդհանուր առմամբ բավարար համարել դրանք: Կարծում ենք, որ պատասխան խաղում երկրի չեմպիոն «Փյունիկը» ոչ մի դժվարության չպետք է հանդիպի «Դերի Սիթիին» հաղթելու հարցում: Ամեն դեպքում մեր չեմպիոնն իր կարգով ավելի բարձր է իռլանդական ակումբից եւ թիմին բնորոշ հատկանիշների դրսեւորման դեպքում պետք է հաղթահարի առաջին փուլի արգելքը:
«Միկան» թեեւ մրցակցի դաշտում 1-2 հաշվով պարտվեց ՄՏԿ-ին, սակայն օգոստոսի 2-ին Երեւանում կայանալիք պատասխան խաղում իր պատմության մեջ առաջին անգամ հաջորդ փուլի ուղեգիր նվաճելու լավ հնարավորություններ է պահպանում: Դրա համար մեր ֆուտբոլիստներին կբավարարի նույնիսկ 1-0 հաշվով հաղթանակը: Շատ կարեւոր է, որպեսզի Երեւանում «Միկան» կարողանա անառիկ պահել սեփական դարպասը: Դա հաջողության հասնելու առաջին նախապայմանն է:
Ինչ խոսք, ավելի դժվարին է «Բանանցի» խնդիրը, որը հանդես է գալու մրցակցի դաշտում: Հաջորդ փուլ դուրս գալու համար «Բանանցին» անհրաժեշտ է հաղթել մրցակցին կամ գոնե խաղն ավարտել արդյունավետ ոչ-ոքի արդյունքով (2-2 եւ ավելի): Ավելորդ չէ նշել, որ «Բանանցը» վերջին երկու տարիներին ՈՒԵՖԱ-ի գավաթի մրցաշարում ավելի հաջող է հանդես եկել մրցակցի դաշտում, քան սեփական հարկի տակ: Այսպես, 2005 թ. առաջին փուլում «Բանանցը» սեփական հարկի տակ Թբիլիսիի «Լոկոմոտիվին» 2-3 հաշվով զիջելուց հետո պատասխան խաղում հաղթել էր 2-0 հաշվով եւ մտել հաջորդ փուլ: Իսկ անցյալ տարի առաջին խաղում, Թբիլիսիում հաղթել էր «Ամերիին» (1-0), բայց Երեւանում զիջեց 1-2 հաշվով եւ դուրս մնաց հետագա պայքարից: Հուսանք, որ այս անգամ էլ «Բանանցը» հաջող կխաղա մրցակցի դաշտում:
ՈՒԵՖԱ-ի գավաթի առաջին հանդիպումներում ամենամեծ անակնկալը մատուցեց Անդորրայի «Սանտա Կոլոման», որը սեփական հարկի տակ 1-0 հաշվով հաղթեց Թել Ավիվի «Մաքաբիին»: «Սանտա Կոլոման» դարձավ Անդորրայի առաջին թիմը, որը հաղթանակ տարավ Եվրոգավաթներում: Ամենախոշոր հաշիվը գրանցվեց Ուելսի «Կարմարտենի» եւ նորվեգական «Բրանի» մրցավեճում: Հյուրերը 8 անպատասխան գնդակ խփեցին ուելսցիների դարպասը: Գերխոշոր հաշիվներ գրանցվեցին նաեւ «Սլավեն» (Խորվաթիա)-«Տեուտա» (Ալբանիա)` 6-2, «Հելսինբորգ» (Շվեդիա)-«Տրանս» (Էստոնիա)` 6-0, «Զբինսկի» (Բոսնիա)-«Պարտիզան» (Սերբիա)` 1-6, «Գլենտորան» (Հս. Իռլանդիա)- ԱԻԿ (Շվեդիա)` 0-5 մրցախաղերում:
Ներկայացնենք նաեւ նախկին ԽՍՀՄ հանրապետությունների թիմերի մասնակցությամբ հանդիպումների արդյունքները.
| «Զլատե» (Սլովակիա)-«Ալմա Աթա» (Ղազախստան) | 3-1 |
| «Արազ» (Ադրբեջան)-«Գրոցլին» (Լեհաստան) | 0-0 |
| «Բելհատուվ» (Լեհաստան)-«Ամերի» (Վրաստան) | 2-0 |
| «Արտմեդիա» (Սլովակիա)-«Զիմբրու» (Մոլդովա) | 1-1 |
| «Նիստրու» (Մոլդովա)-«Հոնվեդ» (Հունգարիա) | 1-1 |
| «Ռիդ» (Ավստրիա)-«Նեւթչի» (Ադրբեջան) | 3-1 |
| «Դինամո» (Թբ., Վրաստան)-«Վադուց» (Լիխտենշտեյն) | 2-0 |
| «Ակտոբե» (Ղազախստան)-«Մատերսբուրգ» (Ավստրիա) | 1-0 |
| «Բ-36» (Ֆարերներ)-«Էկրանաս» (Լիտվա) | 1-3 |
| «Ֆլորա» (Էստոնիա)-«Վոլերենգա» (Նորվեգիա) | 0-1 |
| «Դանգենոն» (Հս. Իռլանդիա)-«Սուդուվա» (Լիտվա) | 1-0 |
| «Մետալուրգ» (Լատվիա)-«Դինամո» (Բրեստ, Բելառուս) | 1-1 |
| «Սկոնտո» (Լատվիա)-«Դինամո» (Մինսկ, Բելառուս) | 1-1 |
ԱՇՈՏ ՀԱՅՐԱՊԵՏՅԱՆ