Եվրո-2009-ի ընտրական մրցաշարի հերթական խաղում Հայաստանի երիտասարդական հավաքականը հյուրընկալել էր ընտրական 2-րդ խմբի հաղթողի գլխավոր հավակնորդներից մեկինՙ չեխերին: Ֆուտբոլասերները մեկ անգամ եւս համոզվեցին, որ չեխերն իրոք ուժեղ մրցակից են եւ հուլիսին Կանադայում կայացած մինչեւ 20 տարեկանների աշխարհի առաջնությունում փոխչեմպիոնի տիտղոսին արժանանալը բնավ էլ պատահականություն չէր: Հյուրերն աչքի ընկան ֆիզիկական լավ պատրաստությամբ, բավական ամրակազմ ու բարձրահասակ էին, ինչը օդային մենամարտերում մեր ֆուտբոլիստների համար մեծ դժվարություններ էր առաջացնում: Սակայն ի պատիվ հայ ֆուտբոլիստների, նրանք կարողացան լրջորեն մրցակցել չեխերի հետ, արժանապատիվ խաղ ցուցադրել եւ հասնել պատվաբեր ոչ-ոքի արդյունքի:
Առաջին խաղակեսում, հատկապես խաղասկզբում, Հայաստանի հավաքականը շատ ակտիվ էր գործում հարձակման գծում: Արդեն 5-րդ րոպեին դաշտի տերերը կարող էին բացել հաշիվը: Վարդան Պետրոսյանի հետ պատ խաղարկելով, Հենրիխ Մխիթարյանը հայտնվեց դարպասի դիմաց, շատ նպաստավոր դիրքում, սակայն մի պահ հապաղեց ու ձեռքից բաց թողեց գոլ խփելու հիանալի հնարավորությունը: Քիչ անց հետեւեց մեր ֆուտբոլիստների նոր վտանգավոր գրոհը եւ կրկին խառնաշփոթ ստեղծվեց հյուրերի տուգանային հրապարակում: Այս անգամ էլ Մխիթարյանին չհաջողվեց եզրափակել աջ թեւից Նորայր Սահակյանի վտանգավոր փոխանցումը:
Ինչպես եւ սպասվում էր, բարձրահասակ հյուրերը գրոհների ժամանակ հիմնականում ապավինել էին բարձրից տուգանային հրապարակ կատարվող փոխանցումներին: Սա որոշ չափով միօրինակություն էր մտցրել չեխերի գործողություններում, սակայն մյուս կողմից բավական դժվարություններ էր առաջացնում մեր պաշտպանների համար: Լավ էր, որ վերջիններս բավական զգոն էին գործում եւ թեեւ հասակով զիջում էին մրցակցին:
Մեր ֆուտբոլիստներն առաջին խաղակեսում եւս մի քանի սպառնալից պահեր ստեղծեցին մրցակցի դարպասին եւ ի վերջո, նրանց ջանքերը պսակվեցին հաջողությամբ: Մեհրաբյանը տուգանային հարվածով գնդակը հասցեագրեց չեխերի տուգանային հրապարակ, որտեղ Վարդան Պետրոսյանը գլխի հարվածով խոցեց դարպասը:
Բնական էր, որ հյուրերն ընդմիջումից հետո փորձելու էին բեկում մտցնել մրցակցությունում եւ փրկել խաղը: Երկրորդ խաղակեսը դեռ նոր էր սկսվել, երբ Չեխիայի հավաքականը վերականգնեց հավասարակշռությունը: Ձախ թեւից տուգանային հրապարակ հասցեագրած գնդակին առաջինը հասավ Պեկհարտը եւ գլխի հարվածով գրավեց դարպասը: Մնացած ժամանակահատվածում մրցակիցներին չհաջողվեց արդյունքի հասնել:
Գրանցվեց մարտական ոչ-քի: Չեխերի նման ուժեղ մրցակցի հետ մրցախաղում այս արդյունքը պետք է գոհացուցիչ համարել: Ընդհանուր առմամբ Հայաստանի երիտասարդական հավաքականն իրեն վատ չդրսեւորեց: Հուսանք, որ ուկրաինացիների հետ վաղը կայանալիք խաղում էլ մեր ֆուտբոլիստներն իրենց լավագույն կողմերով կդրսեւորեն:
Հետխաղյա մամուլի ասուլիսին ներկայացավ միայն Հայաստանի երիտասարդական հավաքականի գլխավոր մարզիչ Վարուժան Սուքիասյանը:
- Իմ կարծիքով խաղը ստացվեց: Գոհ եմ թե՛ տղաների խաղից, թե՛ արդյունքից: Մենք գիտեինք, որ ֆիզիկական պատրաստությամբ մեր ֆուտբոլիստները որոշակիորեն զիջելու են մրցակցին: Ուստի միայն ճկուն մարտավարության շնորհիվ կարող էինք թույլ չտալ մրցակցին շատ վտանգավոր պահեր ստեղծել մեր դարպասին: Տղաներն այսօր խաղացին իրենց հնարավորությունների սահմաններում, ներդրեցին իրենց ողջ կարողությունները: Իրոք որ չեխերը բավական լավ էին պատրաստված եւ շատ դժվար էր պայքար մղել բարձրահասակ, ֆիզիկապես ամուր, արագաշարժ ֆուտբոլիստների հետ: Նման պայմաններում հատկապես վտանգավոր էին եզրային սուր անցումներն ու բարձրից փոխանցումները, անկյունային հարվածները: Մեր ֆուտբոլիստները որքան կարողացան, դիմագրավեցին մրցակցի գրոհներին:
Առաջին անգամ Վարդան Պետրոսյանին խաղացրինք ձախ կիսապաշտպանի գոտում, որպեսզի նա ձախ թեւով միանար գրոհներին, օդային մենամարտերում էլ պայքարեր մրցակցի պաշտպանների հետ: Դա իր արդյունքը տվեց եւ հենց նա էլ դարձավ գոլի հեղինակ:
Մենք սպասում էինք, որ երկրորդ խաղակեսում մրցակիցը զգալիորեն կավելացնի գրոհների թափը, քանի որ չեխերը ֆիզիկապես ավելի լավ էին պատրաստված: Մեր ֆուտբոլիստներին հաջողվեց որոշակիորեն դիմագրավել մրցակցի գրոհներին, մինչեւ որ թարմ ուժեր խաղադաշտ դուրս բերեցինք: Կարծում եմ, որ Բարեղամյանն ու Բալաբեկյանը որոշ չափով ակտիվացրին մեր թիմի հարձակողական գործողությունները: Գոլը մրցակիցն որոշ չափով անսպասելի խփեցՙ շրջապատված լինելով մեր երկու պաշտպաններով: Ի դեպ, գոլի հեղինակ Թոմաշ Պետհարկը հանդես է գալիս «Տոտենհեմում»:
Ուկրաինացիների հետ էլ շատ դժվար խաղ է սպասվում: Շատ բան պայմանավորված կլինի այն բանով, թե ինչպես կվերականգնվեն տղաներն այսօրվա խաղից հետո: Տեսել եմ ուկրաինացիների հետ մեր հավաքականի հանդիպման տեսագրությունը: Մրցակցի խաղն իրոք մեծ տպավորություն էր գործել: Բայց մենք պետք է դուրս գանք խաղադաշտ ու պայքարենք:
Ընտրական 2-րդ խմբում կայացած մյուս խաղում Թուրքիայի երիտասարդական հավաքականը հյուրընկալվելիս 3-2 հաշվով հաղթեց Լիխտենշտեյնի ֆուտբոլիստներին եւ միանձնյա գլխավորեց աղյուսակը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Թուրքիա | 2 | 2 | 0 | 0 | 5-3 | 6 |
| 2. Հայաստան | 3 | 1 | 1 | 1 | 2-5 | 4 |
| 3. Ուկրաինա | 2 | 1 | 0 | 1 | 5-2 | 3 |
| 4. Չեխիա | 1 | 0 | 1 | 0 | 1-1 | 1 |
| 5. Լիխտենշտեյն | 2 | 0 | 0 | 2 | 2-4 | 0 |
ԱՇՈՏ ՀԱՅՐԱՊԵՏՅԱՆ