ՖԻՖԱ-ն հրապարակել է ազգային հավաքականների դասակարգման հերթական ցանկը: Նախորդ ամսվա համեմատ Հայաստանի ազգային հավաքականը նահանջել է 6 հորիզոնականով եւ այժմ 393 վարկանիշով զբաղեցնում է 87-րդ տեղը: Ընտրական «A» խմբում ընդգրկված Հայաստանի հավաքականի մրցակիցներից ամենաբարձր վարկանիշն ունի Պորտուգալիայի ընտրանին, որը 2 տեղով բարձրացել է եւ զբաղեցնում է 8-րդ հորիզոնականը: Լեհերը զբաղեցնում են 16-րդ տեղը (+4): Սերբերը 22-րդն են (-4): Այնուհետեւ գալիս են ֆինները (44-րդ տեղ, -6), բելգիացիները (60-րդ տեղ, +9), ադրբեջանցիները (115-րդ տեղ, -8) եւ ղազախները (120-րդ տեղ, -5):
Ամենամեծ առաջընթացը նկատվել է Ֆիջիի հավաքականի մոտ, որը վարկանիշն ավելացրել է 212-ով` բարձրանալով 51 տեղով: Իսկ ահա Բուրկինա Ֆասոյի հավաքականը 29 տեղով զիջել է դիրքերը: Դասակարգման ցուցակը կրկին գլխավորեց աշխարհի չեմպիոն Իտալիայի հավաքականը, որը նախորդ ցուցակում 3-րդ տեղում էր: Իտալացիներն իրենց տեղը զիջեցին ցուցակը գլխավորող բրազիլացիներին: Իսկ լավագույն տասնյակում միայն մեկ փոփոխություն է կատարվել. չեխերին փոխարինել են անգլիացիները:
Ներկայացնում ենք լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:
| 1. Իտալիա | 1488 |
| 2. Արգենտինա | 1451 |
| 3. Բրազիլիա | 1444 |
| 4. Գերմանիա | 1330 |
| 5. Հոլանդիա | 1246 |
| 6. Ֆրանսիա | 1220 |
| 7. Իսպանիա | 1178 |
| 8. Պորտուգալիա | 1169 |
| 9. Անգլիա | 1165 |
| 10. Խորվաթիա | 1151 |
| 17. Ուկրաինա | 900 |
| 26. Ռուսաստան | 851 |
| 62. Ուզբեկստան | 491 |
| 70. Բելառուս | 445 |
| 81. Մոլդովա | 413 |
| 84. Լիտվա | 398 |
| 87. Հայաստան | 393 |
| 94. Լատվիա | 364 |
| 104. Վրաստան | 327 |
| 115. Ադրբեջան | 287 |
| 120. Ղազախստան | 259 |
| 127. Էստոնիա | 238 |
| 149. Ղրղզստան | 130 |
| 151. Տաջիկստան | 127 |
| 174. Թուրքմենստան | 174 |
ԱՇՈՏ ՀԱՅՐԱՊԵՏՅԱՆ