«ԱԶԳ» ՕՐԱԹԵՐԹ

ԳՈԼԱՌԱՏ ՀԱՆԴԻՊՈՒՄ

Ֆուտբոլի Հայաստանի բարձրագույն խմբի առաջնության 22-րդ տուրի խաղացանկով աղյուսակում առաջին չորս հորիզոնականները զբաղեցնող թիմերը մրցեցին հաջորդ տեղերը զբաղեցնող ակումբների հետ եւ հաղթանակներ տոնեցին:

Պայքարի լարվածությամբ եւ գոլերի առատությամբ առանձնացավ «Արարատի» եւ «Գանձասարի» հանդիպումը: Վերջին չորս հանդիպումներում արարատցիներն անհաջող էին հանդես եկելՙ վաստակելով ընդամենը մեկ միավոր: Իսկ ահա «Գանձասարը» վերջին շրջանում վերելքով է խաղում եւ փորձում է խառնվել մրցանակային տեղերի համար մրցավեճին: Խաղասկիզբը խոստումնալից էր արարատցիների համար, որոնք արդեն 4-րդ րոպեին բացեցին հաշիվը: Գոլի հեղինակը Նշան Էրզրումյանն էր: Սակայն «Գանձասարին» ոչ միայն շուտով հաջողվեց վերականգնել հավասարակշռությունը (Բենիամին Մանուչարյան), այլեւ ռումինացի լեգեոնական Կոնստանտին Պաունեսկու ջանքերով հաշվի մեջ առաջ անցնել: Ճիշտ է, մինչեւ ընդմիջում արարատցի Վահագն Մինասյանը հավասարեցրեց հաշիվը:

2-րդ խաղակեսը բավական հաջող դասավորվեց արարատցիների համար: Նախ Նշան Էրզրումյանը մեն-մենակ հայտնվելով դարպասապահի դիմացՙ կրկին առաջ մղեց իր թիմին, ապա ընդամենը մեկ րոպեի ընթացքում փոխարինման մտած Գեւորգ Նռանյանը երկու անգամ գրավեց «Գանձասարի» դարպասըՙ հաշիվը դարձնելով 5-2: Թվում էր, թե արարատցիները խոշոր հաշվով կհաղթեն, բայց պաշտպանների ու դարպասապահի անփույթ խաղի հետեւանքով խաղավերջին երկու գոլ բաց թողեցին: Հյուրերից աչքի ընկան Էդգար Սաֆարյանն ու Վալերի Ալեքսանյանը: Ինչեւէ, «Արարատին» վերջապես հաջողվեց ընդհատել անհաջողությունների շարքը եւ 5-4 հաշվով հաղթանակ տոնել:

Առաջնության հետնապահներից մեկըՙ «Ուլիսը» մինչ «Փյունիկի» հետ մրցախաղը տոնել էր 3 հաղթանակ, 2 հանդիպում ավարտել էր ոչ-ոքի: Բայց չեմպիոնի հետ մրցավեճում ուլիսցիներին չհաջողվեց շարունակել անպարտելի խաղերի շարքը: «Փյունիկի» գերակշռությունը մրցակցի նկատմամբ արտահայտվեց 3 անպատասխան գոլով, որոնց հեղինակները դարձան Լեւոն Փաչաջյանը, Ֆելիքս Հզեյնան ու Վարդան Պետրոսյանը: «Փյունիկն» ամրապնդեց առաջատարի դիրքերը:

Առաջնության վերջնագծում արդյունավետ խաղ է ցուցադրում «Բանանցը», որը շրջանցելով «Արարատին», այժմ «Փյունիկի» հետ պայքարում է չեմպիոնության համար: Հերթական հաղթանակը «Բանանցը» տոնեց «Շիրակի» նկատմամբ (2-0): Աչքի ընկան Արսեն Բալաբեկյանը եւ Արամ Հակոբյանը (11 մ հարվածով): «Բանանցը» 5-րդ անընդմեջ հաղթանակը տոնեցՙ այդ հանդիպումներում դարպասը պահելով անառիկ:

Մրցանակային տեղերի համար պայքարում հերթական 3 միավորը վաստակեց «Միկան», որը սեփական հարկի տակ 3-1 հաշվով պարտության մատնեց «Կիլիկիային»: Հաշիվը 17-րդ րոպեին բացեց «Միկայի» երիտասարդ հարձակվող Նարեկ Բեգլարյանը: Ընդմիջումից հետո «Միկայից» աչքի ընկան Ալեքսն ու Տիգրան Դավթյանը, իսկ «Կիլիկիայից» միակ գոլը խփեց «Արարատից» հարազատ թիմ վերադարձած Հարություն Հովհաննիսյանը:

Առաջնության հերթական տուրը կկայանա հոկտեմբերի 3-ին: Այդ օրը տեղի կունենա «Փյունիկ»-«Բանանց» սկզբունքային հանդիպումը: «Փյունիկի» հաղթանակի դեպքում չեմպիոնի հարցը կարելի կլինի լուծված համարել, իսկ եթե հաջողությունն ուղեկցի «Բանանցին», ապա ոսկե մեդալների համար մրցավեճը նոր ուժով կբորբոքվի:

Մրցաշարային աղյուսակ

Ռմբարկուները

ԱՇՈՏ ՀԱՅՐԱՊԵՏՅԱՆ