Ինչպես տեղեկացանք բասկետբոլի Հայաստանի ֆեդերացիայի մամուլի ծառայությունից, տղամարդկանց «Գյումրի» թիմը ֆինանսական միջոցների բացակայության պատճառով չի կարողացել ժամանել Երեւանՙ մասնակցելու «Պոլիտեխնիկի» հետ առաջնության կիսաեզրափակիչ հանդիպմանը: Գյումրեցիներին գրանցվել է տեխնիկական պարտություն 0-20 հաշվով եւ թիմը դուրս է մնացել հետագա պայքարից:
Ամենացավալին այն է, որ «Գյումրին» առաջնությունից դուրս մնաց Գյումրիի քաղաքապետարանի պատճառով, որն առաջնության վճռական փուլում հրաժարվել է թիմի հետագա ֆինանսավորումիցՙ չտրամադրելով անհրաժեշտ 30-40 հազար դրամը: Այս առնչությամբ Հայաստանի բասկետբոլի ֆեդերացիան իր խորը հիասթափությունն է արտահայտել, նշելով, որ Գյումրին այլեւս ներկայացված չէ Հայաստանի առաջնությունում, ինչը չի կարող բացասաբար չանդրադառնալ մարզում մարզաձեւի զարգացման վրա: