Սերբիայի նախագահ Բորիս Տադիչը երեկ ցանկություն է հայտնել, որ միջազգային դատարանն արտահայտվի Կոսովոյի անկախության օրինականության առնչությամբ: Սերբական մարզ Կոսովոյի ղեկավարությունը նախօրեին ասել էր, թե մտադիր է անկախություն հռչակել «եկող տարվա մայիսից անհամեմատ շուտ»:
Տադիչը կողմնակից է, որ ՄԱԿ-ի Անվտանգության խորհուրդն Արդարության միջազգային դատարանին հանձնարարի տվյալ հարցի քննությունը, նշում է Ինտերֆաքս գործակալությունը:
Երկուշաբթի օրը Բրյուսելում ԵՄ երկրների արտգործնախարարները չէին կարողացել համաձայնության գալ Կոսովոյի հարցում, քանի որ Կիպրոսը, Հունաստանը, Սլովակիան եւ Իսպանիան դեմ էին արտահայտվել մարզի միակողմանի անկախացմանը: Մասնավորապես Կիպրոսը երկյուղներ ունի, որ Կոսովոյի անկախության ճանաչմանը կհաջորդի, այսպես կոչված, Կիպրոսի թուրքական հանրապետության ճանաչումը:
ԵՄ-ը մտադիր է դեկտեմբերի 14-ի գագաթաժողովում ընդունել Կոսովոյի ճանաչման սեփական ծրագիրը, որը Կոսովոյից պահանջում է մինչեւ 2008-ի փետրվար անկախություն չհռչակել, հարգել փոքրամասնությունների իրավունքները, ընդունել նոր սահմանադրություն: Միաժամանակ նախատեսվում է օգնել Սերբիայում բարեփոխումների իրականացմանը եւ ԵՄ-ի հետ նրա կապերի սերտացմանը:
Սակայն Ֆրանսպրեսը մեջբերում է Սերբիայի փոխվարչապետ Բոժիդար Ջելիչի խոսքերը, թե «Կոսովոն չի փոխանակվի ԵՄ-Սերբիա համաձայնագրով»: