Ի՞նչ միտումներ կարձանագրվեն այս տարվա հունվար-փետրվարին
2007-ի նոյեմբերին Հայաստանի անշարժ գույքի շուկայում իրականացվել է գրեթե 15 հազար գործարք, որը թեեւ 36 տոկոսով գերազանցում է 2006-ի նոյեմբերի ցուցանիշը, բայց նախորդ ամսվաՙ հոկտեմբերի համեմատ նվազել է 6,3 տոկոսով: Վերոնշյալ գործարքներից 5805-ը օտարման գործարքներն են, որոնց մեջ ավանդաբար գերակշռում են առուվաճառքի գործարքները եւ փոքր մասն են կազմում նվիրատվություններն ու փոխանակությունները: Գործարքների քանակով նույնպես, նախորդ ամսվա համեմատ, որոշակիՙ գրեթե 4 տոկոսով նվազում է արձանագրվել: Անշարժ գույքի կադաստրի պետական կոմիտեի շուկայի վերլուծության ցուցանիշներից տեղեկանում ենք նաեւ, որ այս տարվա նոյեմբերին իրականացված անշարժ գույքի օտարման գործարքների մոտ 35 տոկոսն արձանագրվել է Երեւանում: Մայրաքաղաքում առուվաճառքի գործարքների 55,1 տոկոսն արձանագրվել է բազմաբնակարան շենքերի բնակարանների նկատմամբ:
Երեւանում բնակարանների միջին գների աճի տեմպը չորրորդ ամիսն է, ինչ փոքր-ինչ նվազել է միջին ամսական 2-3 տոկոսից եւ կայունացել 1-2 տոկոսի շրջանում: Նոյեմբերին այդ աճը կազմել է 1,7 տոկոս: Ըստ համայնքների, Երեւանում բնակարանների 1 քմ մակերեսի միջին շուկայական գներն այսպիսին են եղել.
Միջին գները (դրամ)
| Համայնքներ | նոյեմբեր 2006թ. | նոյեմբեր 2007թ. | հոկտեմբեր 2007թ. |
| Կենտրոն | 401500 | 473100 | 465500 |
| Արաբկիր | 321900 | 377500 | 377300 |
| Քանաքեռ-Զեյթուն | 218300 | 295000 | 282900 |
| Նոր Նորք | 187300 | 251300 | 245000 |
| Ավան | 180100 | 250800 | 243700 |
| Էրեբունի | 194500 | 250500 | 243900 |
| Շենգավիթ | 202000 | 261700 | 259500 |
| Դավթաշեն | 205500 | 274600 | 274400 |
| Աջափնյակ | 192600 | 257100 | 256000 |
| Մալաթիա-Սեբաստիա | 182300 | 250000 | 246400 |
| Նուբարաշեն | 117600 | 137500 | 133200 |
| Միջինը Երեւանում (բացի Նորք-Մարաշից) | 218600 | 279900 | 275300 |
Մարզերում բնակարանների միջին գների աճը կազմել է 2,3 տոկոս: Երեւանից հետո ամենաթանկ բնակարաններն Աբովյանում են, որտեղ 1 քմ մակերեսի շուկայական գինը նոյեմբերին կազմել է 151 հազար դրամ, Վաղարշապատում (Էջմիածնում)ՙ 143 հազար դրամ, Ջերմուկումՙ 114 հազար դրամ: Ապա գալիս են Մասիսը, 1 քմ-նՙ 112 հազար դրամ, Աշտարակըՙ 111 հազար դրամ, Նոր Հաճընըՙ 111 հազար դրամ եւ Ծաղկաձորըՙ 110 հազար դրամ:
Մայրաքաղաքում արձանագրված անհատական տների առուվաճառքի գործարքների ցուցանիշների վերլուծությունից պարզվել է, որ այստեղ միջին գները նոյեմբերին հոկտեմբերի համեմատ աճել են 1,5 տոկոսով: Միջինացվածՙ 250 քմ շինության մակերես եւ 400 քմ տնամերձ ունեցող անհատական տների միջին 1 քմ-ի միջին գներն, ըստ համայնքների, Երեւանում կազմել են.
Միջին գները (դրամ)
| Համայնքներ | նոյեմբեր 2006թ. | նոյեմբեր 2007թ. | հոկտեմբեր 2007թ. |
| Կենտրոն | 402600 | 476700 | 472700 |
| Արաբկիր | 323000 | 391000 | 390800 |
| Քանաքեռ-Զեյթուն | 219400 | 297500 | 287700 |
| Նորք-Մարաշ | 193900 | 248100 | 245400 |
| Ավան | 181200 | 254000 | 246200 |
| Էրեբունի | 195600 | 252900 | 249600 |
| Շենգավիթ | 203000 | 264400 | 261800 |
| Դավթաշեն | 206700 | 279100 | 277600 |
| Աջափնյակ | 193800 | 262100 | 259300 |
| Մալաթիա-Սեբաստիա | 183300 | 254600 | 249000 |
| Նուբարաշեն | 118600 | 138700 | 133900 |
| Միջինը Երեւանում (բացի Նոր Նորքից) | 220100 | 283600 | 279500 |
Մարզերում 200 քմ շինության եւ 1000 քմ տնամերձ մակերեսով միջինացված անհատական տների գներն ամենաթանկն են եղել Ծաղկաձորում, 1 քմ-նՙ գրեթե 171 հազար դրամ, Աբովյանումՙ 158 հազար դրամ, Վաղարշապատում 1 քմ-նՙ 145 հազար դրամ: Այնուհետեւ գալիս է Աշտարակըՙ 116 հազար դրամ, Նոր Հաճընըՙ 116 հազար դրամ, Մասիսըՙ 115 հազար դրամ: Նախորդ ամսվա համեմատ գների աճի տեմպը մարզերում ավելի բարձր է եղել, քան Երեւանում եւ կազմել է 2,6 տոկոս:
Փաստորեն, անշարժ գույքի շուկայի զարգացման տեմպերը շարունակում են պահպանվել, ինչի մասին վկայում են համեմատությունները 2006-ի համապատասխան ամսվա հետ: Միաժամանակ, ինչպես եւ կարելի էր ենթադրել, նոյեմբերին հոկտեմբերի համեմատ աշխուժությունը որոշակիորեն նվազել է: Դա պայմանավորված է սեզոնային գործոնով: Դեկտեմբերին, ամենայն հավանականությամբ, ինչպես ընդհանուր, այնպես էլ առուվաճառքի գործարքների քանակը, դարձյալ նույն գործոնով պայմանավորված, նոյեմբերի համեմատ ավելի կնվազի:
Ինչպիսի՞ն կլինի իրավիճակը անշարժ գույքի շուկայում այս տարվա հունվար եւ փետրվար ամիսներին: Այս հարցն, անշուշտ, շատերին է հետաքրքրում, քանի որ բացի սեզոնային գործոններից, անշարժ գույքի շուկայի վրա ազդելու են նաեւ նախագահական ընտրությունները եւ դրանով պայմանավորված գործընթացները: Կարելի է ենթադրել, որ վերոնշյալ երկու ամիսներից յուրաքանչյուր հաջորդ ամսին նախորդ ամսվա նկատմամբ գործարքների քանակը նվազելու է: Թեեւ խորհրդարանական ընտրությունները 2007-ին չազդեցին շուկայի վրա եւ առաջիկա ընտրությունների գործոնով պայմանավորված պասսիվացում նույնպես դեռ չի նկատվում, ինչի մասին իր տարեվերջի մամուլի ասուլիսի ժամանակ հավաստեց անշարժ գույքի կադաստրի կոմիտեի նախագահ Մանուկ Վարդանյանը, բայց այդ հավանականությունն այս տարեսկզբի ամիսներին առկա է:
Ազդե՞լ են նախագահական ընտրություններն անշարժ գույքի շուկայի վրա, թե՞ ոչ, հունվար-փետրվարին հնարավոր կլինի պարզել միայն համեմատելով 2007-ի նույն ամիսների ցուցանիշների հետ: Եթե գործարքների քանակն այդ համեմատությամբ ավելացած լինի, ապա դա կնշանակի, որ ընտրություններն այնուամենայնիվ չեն ազդել անշարժ գույքի շուկայի վրա: Դա նաեւ ընտրությունների արդյունքի վերաբերյալ որոշակի ցուցիչ կդառնա, քանի որ կբացահայտի, թե բնակչությունը ի՞նչ սպասումներ ունի եւ պե՞տք է ակնկալել ցնցումներ, թե՞ ամեն ինչ կընթանա սահուն եւ առանց անկայունության:
ԱՐԱ ՄԱՐՏԻՐՈՍՅԱՆ