«ԱԶԳ» ՕՐԱԹԵՐԹ

«ԵՍ ԿԱՐՈՂ ԵՄ ԱՆՇԱՀԱԽՆԴԻՐ ԾԱՌԱՅԵԼ ԺՈՂՈՎՐԴԻՍ»

Ասում է ՀՀ նախագահի թեկնածու, Ժողովրդական կուսակցության նախագահ, «ԱԼՄ հոլդինգի» տնօրեն Տիգրան Կարապետյանը

- Պարոն Կարապետյան, քանի որ Դուք մասնակցում եք ՀՀ նախագահի տեղի համար մղվող ընտրապայքարին, ուստի հաշվի եք առել Ձեր հնարավորությունները: Հաղթանակի հասնելու համար ինչպիսի՞ հնարավորություններ ունեք:

- Այն երկրներում, որտեղ չեն լուծված սոցիալ-տնտեսական հարցերը, որտեղ այս իմաստով անկայուն վիճակ է, որտեղ կան դժգոհ մարդկային խմբեր, ոչ ոք չի կարող կանխատեսել, թե ինչպիսի արդյունքներ կլինեն ընտրություններից հետո: Այնպես որ, ամեն մի պայքար արդարացված է:

- Հիմա Դուք պայքարի մեջ եք մտել դժգոհության այս գործո՞նը հաշվի առնելով:

- Ոչ միայն: Ես գալիս եմ ծառայելու ժողովրդին: Ի տարբերություն մյուսների, իմ մոտեցումները ընդունելի են ժողովրդի կողմից, որովհետեւ ես ոչ թե այսօր եմ ի հայտ եկել, այլ արդեն երրորդ անգամ եմ մասնակցում ընտրություններին: Ժողովուրդն ինձ շատ լավ գիտե, գիտե, որ ես ունակ եմ իրեն անշահախնդիր ծառայելու:

- Ընտրությունների նախօրյակին սոցիոլոգիական ամենատարբեր հարցումներ են անցկացվում: Ինչպե՞ս եք վերաբերվում այդ հարցումներին:

- Շատ վատ: Բացասական վերաբերմունք ունեմ, որովհետեւ յուրաքանչյուրն այդ սոցիոլոգիական հարցումներից որսում է այն, ինչ իրեն պետք է, բայց ոչՙ ճշմարտությունը:

- Ովքե՞ր են այդ «որսացողները»:

- Իշխանությունները, սոցիոլոգները, որոնք ցանկանում են, որ փողով պատվիրենք այդ հետազոտությունները: Ամեն դեպքում, այդ ուսումնասիրություններում ճշմարտություն չկա:

- Որքան նկատելի է, Դուք կոշտ արտահայտություններ չեք անում Ձեր մրցակիցների մասին: Ինչո՞վ է դա պայմանավորված:

- Ընդհանրապես քննադատությունը պետք է լինի կառուցողական: Եթե միայն քննադատությունն է դառնում այն հենարանը, որով առաջ ես գնում, ուրեմն դու անելիք չունես: Ես ունեմ իմ անելիքները եւ դրանց մասին եմ խոսում: Այն մարդիկ, որոնք ուզում են ասել, թե իրենք լավն են, ուրիշներըՙ վատ, ուրեմն մեղք են գործում: Ասում են, թե իրենց մեղքը փոքր է, ուրիշներինըՙ մեծ: Բայց հենց սա էլ ապացուցում է, որ մեղք են գործում:

- Այսինքն, նախագահի թեկնածուներից յուրաքանչյուրը մեղքեր ունի՞:

- Յուրաքանչյուրը: Ինչպես ամեն մի սովորական մարդ: Պետք է հաշվի առնել, որ նրանք նաեւ պաշտոններ են զբաղեցրել:

- Դուք թեկնածուներից գուցե միակն եք, որ պետական պաշտոն չեք զբաղեցրել:

- Ոչ, ես չեմ զբաղեցրել որեւէ պաշտոն: Ոչ էլ աշխատել եմ Հայաստանի բիզնեսի ոլորտում, որպեսզի որեւէ մեկը ասի, թե հարստացել եմ ժողովրդի հաշվին: Այս իմաստով իմ կենսագրությունը մաքուր է:

- Բայց կրկին պետք է դառնանք սոցիոլոգիական հարցումներին: Ըստ տեղական սոցհարցումների, մասնավորապեսՙ Ահարոն Ադիբեկյանի ղեկավարած կենտրոնի հարցումների, պատկերը մի փոքր այլ է եւ չի խոսում Ձեր բարձր վարկանիշի մասին:

- Մենք պարոն Ադիբեկյանին գիտենք այն ժամանակներից, երբ նա մանկական երկաթգծում պռավադնիկՙ ուղեկցող էր: Սկզբում, ճիշտ է, տոմսեր էր ծախում: Մենք նրան հիշում ենք, ինքը մեր կողմերից է: Կայարանի շրջանում է ապրել: Ինքը մի քանի անգամ դիմել է մեզՙ փողով ուսումնասիրություններ անցկացնելու համար: Ես հրաժարվել եմ, ասել եմՙ մեզ պետք չէ, որովհետեւ մենք ինքներս կարող ենք անել: Եթե մի բանի մեջ գումար կա... Եթե նա դուրս է գալիս եւ ասում է այն թվերը, որ ցանկանում են տեսնել իշխանությունները, ապա ես չեմ հավատում այդ ուսումնասիրությանը: Ես մտածում եմ, որ Ադիբեկյանը գիտության հետ ընդհանրապես կապ չունի: Այդպիսի ուսումնասիրությունների արդյունքները հրապարակելիս փորձում են ազդել հասարակության հոգեբանության վրա:

- «Փաստարկ» ակումբում Ձեր վերջին ասուլիսի ժամանակ Դուք երաշխիքներ խոստացաք Ձեր ընտրողներին: Ինչպե՞ս կմանրամասնեք Ձեր այդ երաշխիքները:

- Ես խոստանում եմ անել այն, ինչ մինչեւ այսօր չի արված: Որո՞նք են դրանք: Տեսեք: Մրցակցություն չկա ո՛չ իշխանական թեւում, ո՛չ բիզնեսի ոլորտում: Իշխանական թեւերը տարանջատված չեն: Ես նկատի ունեմ նախագահական, վարչական, գործադիր, օրենսդիր եւ դատական ոլորտները: Այսօր այդ տարանջատումը արված չէ: Ես պատրաստ եմ դա անելու: Նախարարներն այսօր փաստորեն քաղաքական միավորներ են, կուսակցություններ են ներկայացնում: Դա անընդունելի է: Ես պատրաստ եմ դա շտկելու: Տեղական ինքնակառավարման մարմինը պետք է լինի չեզոք: Ես պատրաստ եմ դա շտկելու... Տեսեք, ինչքան բան կա, որ կարելի է անել: Խնդրեմ, խոսենք ըստ ոլորտների: Գյուղացուն հողը տվել են, բայց մշակելու հնարավորություն նա չունի, որովհետեւ մեխանիզացիա չեն տվել: Ի՞նչ է նշանակում, որ մի ողջ մարզում վերամշակման մի գործարան կա միայն: Մարդիկ իրենց քրտինքով աճեցրած բերքը բերում են վերամշակողի դուռը, վերջինս ժամեր, օրեր շարունակ բերքը չի ընդունում, այն որակազրկվում է եւ հետո արդեն իր ցանկացած ցածր գինն է առաջարկում, այլապես հրաժարվում է ընդունել: Ինչո՞ւ, ասենք, մայրաքաղաքում չունենանք գյուղմթերքների մեծածախ շուկա կամ բազա: Ինչո՞ւ պետք է գյուղացին գա ու ընկնի վերավաճառողի ձեռքը: Ինչո՞ւ պետք է դիզելային վառելանյութը թանկանա գյուղատնտեսական աշխատանքների ամենաթեժ ժամանակ... Այստեղ անելիքներ չկա՞ն: Կան: Եվ եթե հնարավորություն լիներ լծակներ ունենալուՙ այս բոլոր հարցերը կշտկվեին:

- Խոսքը վերաբերում է նախագահական, իշխանական լծակների՞ն:

- Իհարկե:

- Եվ եթե Դուք ունենաք այդ լծակներըՙ կկարողանա՞ք իրագործել Ձեր նպատակները:

- Այո: Ինչո՞ւ ուրիշը կարող է ունենալ այդ լծակները, իսկ եսՙ ոչ: Ինչո՞վ եմ պակաս այդ մեկ ուրիշից: Այսօրվա իշխանավորները, շատ կներեք, կոմերիտական նախկին աշխատողներ են: Ինչո՞վ են առավել: Սոկրատե՞ս են, Չերչի՞լ են, ի՞նչ է: Ի՞նչն է, որ նրանք կարող են, մենք չենք կարող: Մենք էլ կարող ենք: Բայց կարեւոր է, որ լեգիտիմ իշխանություն ձեւավորվի, որ երկրի նախագահը լինի ազգընտիր:

- Դուք կասկածներ ունե՞ք, որ այս ընտրությունները կարող են կեղծվել:

- Դեռեւս ոչ: Ես գիտեմ, որ այսօր քաղաքական միավորներ կան, որոնք ասում են, թե այս ընտրությունները նույնպես կկեղծվեն: Բայց այդպիսի բան նախապես հայտարարել չի կարելի, որովհետեւ բոլոր ուժերը շատ ուշադիր կհետեւեն ընտրություններին: Իշխանությունն էլ շատ ուշադիր կլինի, որ չվարկաբեկվի: Ինձ թվում է, որ նորընտիր նախագահը չի ուզենա սկանդալային ձեւով ընտրվել: Բայց այսօր խոսել առաջիկա ընտրությունների կեղծ լինելու մասին ես անբարոյականություն եմ համարում: Սա ունի նաեւ վտանգ: Եթե անընդհատ ու շատ ես խոսում այս կեղծիքների մասին, ապա դրդում ես որոշ ուժերիՙ հենց դիմել կեղծիքների: Այդ որոշ ուժերն էլ այսպես են մտածում. «Դե, եթե ամեն դեպքում պիտի խոսեն կեղծիքների մասին, եկեք կեղծենք»:

- Ձեր վերջին ասուլիսների ժամանակ Դուք հայտարարել եք, որ ՀՀ նախագահի հիմնական թեկնածուն Դուք եք լինելու, որովհետեւ ժողովուրդը Ձեզ շատ է սիրում: Ես ճի՞շտ եմ հասկացել:

- Սիրելու տեսանկյունիցՙ այո: Ինչու չէՙ նաեւ այլ տեսանկյուններից: Եթե այսօր ուժեր կան, որոնք պայքարում են իրար դեմ եւ դրանով իրենք իրենց թուլացնում են, ապա դա լավ բանի չի հանգեցնի: Ժողովուրդը ցանկանում է կայուն իրավիճակ: Ծայրահեղ բեւեռացումների, ծայրահեղ սրացումների այս ֆոնին ես շատ նորմալ կդիտվեմ: Ամեն դեպքում ես այսօր միակն եմ, որին հասարակ ժողովուրդը սիրում է, հարում է մեզ: Մենք տեսնում ենք, չէ՞, այդ ամենը: Որտեղ գնում ենք, սեղաններ են գցում, գալիս են, խոսում են, հետաքրքրվում են:

- Արվեստի, մշակույթի շատ մարդիկ արդեն իրենց զորակցությունն են հայտնել այս կամ այն թեկնածուին:

- Դե, նրանք այն «աստղերն» են, որոնք օգտվում են բոլոր բարիքներից, հեռուստատեսային բազմաթիվ հաղորդումների են մասնակցում իշխանամետ հեռուստաընկերություններում, «Եվրոտեսիլների» են գնում եւ այլն: Ես հասկանում եմ նրանց: Բայց մեզ էլ շատ աջակցողներ կան գիտության, արվեստի ոլորտներից: Կան, շատ կան:

- Դուք հայտարարել եք, որ ԱԼՄ-ի եթերը սիրով կտրամադրեք նախագահության բոլոր թեկնածուներին: Ձեր առաջարկը ուժի մե՞ջ է:

- Այո, իհարկե: Մենք հրավիրել ենք բոլորին:

- Դուք Հայաստանի հասարակությանը հայտնի դարձաք նախ եւ առաջ ոչ թե որպես քաղաքագետ, ոչ թե կուսակցության ղեկավար, այլ առաջին հերթին որպես «ԱԼՄ հոլդինգի» տնօրեն:

- Այ, տեսեք, հիմա մեզ քննադատում են այն բանի համար, որ մեր երգիչները, ասմունքողները ռաբիս են: Բայց իրականում ի՞նչ է կատարվել: Մեզ քննադատում են, բայց անում են այն, ինչ մենք առաջինն ենք արել, այսինքն, իրենց հեռուստաալիքներով երգում են ոչ պրոֆեսիոնալ մարդիկ, եւ դա իրենք նվաճում են համարում, շոուներ են սարքում: Բա, եղա՞վ: Էդ որ քննադատում եք, ինչո՞ւ եք վերցնում, ընդօրինակում: Մեր ու նրանց տարբերությունը միայն այն է, որ մենք ոչ մեկից SMS չենք պահանջում, որովհետեւ դա ազդում է ընտանիքների բյուջեի վրա: Իրենց համար դա բիզնես է, ինձ համարՙ ծառայություն է ժողովրդիս:

- Եվ այսպես, Դուք արդեն ՀՀ նախագահի ընտրությունների մրցապայքարի մեջ եք: Որո՞նք են Ձեր նախընտրական ծրագրի հիմնական շեշտադրումները:

- Նախ եւ առաջՙ իշխանական թեւերի տարանջատում, արդյունաբերության եւ գյուղատնտեսության վերականգնում, նոր աշխատատեղերի ստեղծում, մրցակցություն իշխանական թեւերի միջեւ եւ բիզնես ոլորտում, արարելու, ստեղծագործելու հնարավորությունների ստեղծում ու ապահովում...

- Շնորհակալություն մեր հարցերին պատասխանելու համար:

Հարցերն ուղղեց ՍԵՐԳԵՅ ԳԱԼՈՅԱՆԸ