Սիրուշոն ելույթ կունենա մայիսի 20-ինՙ մրցույթի առաջին կիսաեզրափակիչում
Այս տարվա Եվրոտեսիլին Հայաստանը ներկայացնող երգչուհի Սիրուշոն ելույթ կունենա մայիսի 20-ին` մրցույթի առաջին կիսաեզրափակիչում: Սիրուշոյի ելույթի օրը որոշվել է նախօրեին Բելգրադում տեղի ունեցած վիճակահանության արդյունքում:
Նշենք, որ մրցույթին մասնակցել ցանկացող երկրների թվի ավելացման պատճառով «Եվրոտեսիլ-2008»-ի մասնակիցների ելույթի կանոնները փոխվել են, այժմ նրանք պետք է մրցույթի եզրափակիչում մասնակցելու իրավունք ձեռք բերեն երկու կիսաեզրափակիչների ընթացքում` մայիսի 20-ին եւ 22-ին:
Առաջին կիսաեզրափակիչում Սիրուշոն կերգի եւս 18 երկիր ներկայացնող երգիչների հետ: Մասնակիցների ելույթների հերթականությունը որոշվելու է մարտի 13-ին Բելգրադում տեղի ունենալիք վիճակահանության արդյունքում: Եվրոտեսիլի եզրափակիչը տեղի կունենա մայիսի 24-ին, Սերբիայի մայրաքաղաքում: