Ընտրակեղծիքներից խուսափելու նպատակներ ու ձեռնարկումներ ունեցողներ են եղել դեռ ամիսներ առաջ: Երեկ այդ սրտացավության հեղինակըՙ ՀՀ նախագահի թեկնածու Լեւոն Տեր-Պետրոսյանի նախընտրական շտաբի մոնիտորինգի խումբը Ռուբեն Թորոսյանի գլխավորությամբ ներկայացրեց սեփական գործունեության արդյունքները: Այն էՙ եզրակացությունՙ առաջիկա նախագահական ընտրությունների նախապատրաստական շրջանի մասին: Այդ շրջանն էլ ընդգրկում է նախորդ տարվա նոյեմբերի 9-ից այս տարվա հունվարի 20-ն ընկած ժամանակահատվածը: Եզրակացության «Ընտրական իրավունքի դեմ ... ինչից երբեք չեն խուսափել» խորագիրն արդեն փոքրացնում է բովանդակությունը ներկայացնելու անհրաժեշտությունը: Ի սկզբանե խախտումների հեղինակումից իրենց զերծ տեսնելով են գործել ԼՏՊ-ի նախընտրական շտաբի մոնիտորինգի խմբի ներկայացուցիչներըՙ 38 էջանոց եզրակացությունում չեն տեղավորել սեփական թեկնածուի թույլ տված խախտումները: Փոխարենը բարեխղճորեն արձանագրել են նախագահի եւ վարչապետի կամ հանուն վերջինիս շահեկանորեն ներկայացնելու թույլ տրված խախտումներն ու առավել բարեխղճորեն արձանագրել ՀՀ առաջին նախագահի դեմ իրականացված հակաքարոզչության դեպքերը:
Նշված ժամանակահատվածում կատարած դիտարկումների արդյունքները, ընտրական փուլի օրինականության չափ ու ձեւը քննարկելու հրավեր է արել ԼՏՊ-ի նախընտրական շտաբի մոնիտորինգի խումբը: Չնայած դրան 80 հրավիրյալներից շատ քչերն էին ներկայացել: ՀՀ նախագահի 8 թեկնածուների նախընտրական շտաբներից հրավերն անպատասխան չի թողել եւ ոչ մեկըՙ Արտաշես Գեղամյանի եւ Վազգեն Մանուկյանի շտաբներից անհարիր են համարել քննարկմանը մասնակցելը, քանի որ նախաձեռնողը ԼՏՊ-ի նախընտրական շտաբն է, Արամ Հարությունյանը չի բացառել իր ներկայությունը, Արթուր Բաղդասարյանի շտաբից հաստատակամորեն խոստացել են ներկա գտնվել ու չեն եկել, Արման Մելիքյանի շտաբի ղեկավարին էլ անձնական խնդիրներով զբաղվածությունն է խանգարել ներկայանալու: Սերժ Սարգսյանի նախընտրական շտաբի պարագան էլ Ռուբեն Թորոսյանը պարզ ու բացատրված համարեց: Փաստելով ՀՀ մարդու իրավունքների պաշտպանի տեղեկացված լինելն ու չներկայանալըՙ Ռուբեն Թորոսյանը զարմանք հայտնեց շահագրգիռ միջազգային կազմակերպությունների անտարբերության առնչությամբ: Մինչդեռ, բանախոսի կարծիքով, «Ընտրական օրինականության հարցում կարեւորագույն խնդիրներ ունենք, որոնց լուծումը միայն Լեւոն Տեր-Պետրոսյանի նախընտրական շտաբի ուսերին չպետք է մնա: Մենք պատրաստ ենք յուրաքանչյուր նախընտրական շտաբի հետ բանավիճել»:
Ն.Պ.