Իր նախորդ ահազանգին իրավապահներն օպերատիվ արձագանքել են
ԱԺ պատգամավոր, ՕԵԿ Գյումրու մարզային կառույցի եւ Արթուր Բաղդասարյանի տեղական նախընտրական կենտրոնի ղեկավար Հովհաննես Մարգարյանը դեռ հունվարի 31-ին Ժուռնալիստների «Ասպարեզ» ակումբում հրավիրել էր մամուլի ասուլիս` ահազանգելով տեղի գործարարների նկատմամբ Գյումրու հարկային տեսչության կողմից կիրառվող նախընտրական պարտադրանքի մասին, որպես փաստարկ ներկայացնելով տպագիր մի ձեւաթղթի պատճենը: Փետրվարի 12-ին նույնպիսի առիթով հրավիրած ասուլիսում պատգամավորը նախ շնորհակալություն հայտնեց ներկա լրագրողներին ու լրատվամիջոցներին, որոնց հրապարակումներին, մասնավորապես «Ազգի» հրապարակմանը, իր հավաստմամբ, օպերատիվ արձագանքել են իրավապահ մարմինները, եւ դա իր դրական ազդեցությունն ունեցել է:
Այս անգամ, ինչպես նշեց Հովհ. Մարգարյանը, իրեն հայտնի է դարձել, որ արդեն տեւական ժամանակ նման պարտադրանք է կիրառվում «Շիրակջրմուղկոյուղու» Գյումրու մասնաճյուղի հարյուրավոր աշխատակիցների նկատմամբ: Նրանց պարտադրում են ամսի 19-ի առավոտյան գալ ձեռնարկություն, բերել ցուցակներ իրենց ընտանիքներով, հարազատներով, եւ տրամադրվող մեքենաներով գնալ քվեարկության, քվեարկել Սերժ Սարգսյանի օգտին: Կոլեկտիվից եղել են մարդիկ, ովքեր հրաժարվել են այս հարկադրանքին ենթարկվելուց: Հ. Մարգարյանը ներկայացրեց երկու աշխատակիցների աշխատանքից ազատման հրամանները, որը, ըստ նաեւ եղած վկայությունների, պարտադրանքից հրաժարվելու արդյունք է: Պատգամավորը իրավապահներին կոչ արեց այս անգամ եւս ստուգել նույն ամսաթվով այդ եւ ուրիշ աշխատողների աշխատանքից ազատման հիմնավորվածությունը, ինչը թույլ կտա պարզել իսկությունը:
Գ. Մ.