«ԱԶԳ» ՕՐԱԹԵՐԹ

ՀՀ ՀԱՎԱՔԱԿԱՆՆ ԱՌԱՋԱԴԻՄԵԼ Է

ՖԻՖԱ-ն երեկ հրապարակել է ազգային հավաքականների դասակարգման հերթական ցուցակը: Հայաստանի ընտրանին հունվարի համեմատ ցուցակում 4 հորիզոնականով բարձրացել է` զբաղեցնելով 81-րդ տեղը: Չնայած դրան, հավաքականի վարկանիշը 3-ով նվազել է: Ի դեպ, ինչպես տեղեկացանք ՀՖՖ մամուլի ծառայությունից, Հայաստանի հավաքականը մարտի 26-ին Ռոտերդամում ընկերական մրցախաղում ուժերը կչափի Ղազախստանի ընտրանու հետ:

Աշխարհի առաջնության ընտրական մրցաշարում Հայաստանի հավաքականի մրցակիցներից կրկին ամենաբարձր վարկանիշն ունեն իսպանացիները, որոնք պահպանել են դիրքերը 4-րդ հորիզոնականում: Հաջորդը Թուրքիայի հավաքականն է, որը 2 տեղով նահանջել ու զբաղեցնում է 18-րդ հորիզոնականը: 6 տեղով առաջադիմել է Բելգիայի ընտրանին, որն այժմ 43-րդ հորիզոնականում է: Բոսնիացիները 8 տեղով նահանջել են եւ զբաղեցնում են 59-րդ հորիզոնականը: Իսկ Էստոնիայի հավաքականը մեկ տեղով նահանջել է եւ գրավում է 125-րդ տեղը:

Ընդհանրապես, դասակարգման ցուցակում փոփոխություններն այնքան էլ զգալի չեն: Բացառություն են կազմում Աֆրիկայի ներկայացուցիչները, որոնց ցուցանիշների վրա զգալի ազդեցություն են ունեցել վերջերս ավարտված մայրցամաքի առաջնության արդյունքները: Այսպես, Աֆրիկայի գավաթը 6-րդ անգամ նվաճած Եգիպտոսի ընտրանին 6 հորիզոնականով առաջադիմել է եւ զբաղեցնում է 29-րդ տեղը: Ամենամեծ առաջընթացն ունեցել է բրոնզե մրցանակակիր Գանայի հավաքականը, որը վարկանիշն ավելացրել է 330-ով եւ 29 տեղով բարձրացել է` զբաղեցնելով 14-րդ հորիզոնականը: Իսկ ահա Հաիթիի հավաքականը նահանջել է 27, նիգերիացիները` 26 հորիզոնականով: 20 տեղով նահանջել է Տրինիդադ եւ Տոբագոյի ընտրանին:

Առաջատար տասնյակում ընդամենը մեկ փոփոխություն է կատարվել: Մեկ հորիզոնականով վեր բարձրանալով, հույները շրջանցել են խորվաթներին եւ եզրափակում են լավագույն տասնյակը, որի մնացած ինը հավաքականները պահպանել են դիրքերը: Ներկայացնում ենք լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:

ԱՇՈՏ ՀԱՅՐԱՊԵՏՅԱՆ