Հայաստանի Հանրապետության կենտրոնական բանկը «Կենդանակերպի նշաններ» միջազգային դրամագիտական ծրագրի շրջանակներում թողարկել է երկվորյակների պատկերով արծաթե հուշադրամ: Ծրագրում ներառված են կենդանակերպի տասներկու նշանները:
Հուշադրամի դիմերեսի կենտրոնում պատկերված է Հայաստանի Հանրապետության զինանշանը, որից ներքեւ շրջանագծով հայերեն եւ անգլերեն անվանական արժեքի մակագրությունն էՙ «DRAM 100 ԴՐԱՄ»: Զինանշանից վերեւ նշված է թողարկման տարեթիվըՙ «2008»: Ամբողջը եզերված է գծավոր շրջանագծով: Նշված շրջանագծի եւ եզրաշուրթի միջեւ առկա է երկրորդ գծավոր շրջանագիծը: Երկու շրջանագծերի միջեւ դաշտը բաժանված է տասներկու հավասար մասերի, որոնցում պատկերված են կենդանակերպի նշանների խորհրդանիշերը: Եզրաշուրթի մոտ վերեւում հայերեն, իսկ ներքեւում անգլերեն շրջանագծով մակագրված է համապատասխանաբարՙ «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» եւ «REPUBLIC OF ARMENIA»:
Հուշադրամի դարձերեսի կենտրոնում աստղային երկնքի ֆոնի վրա երկվորյակների պատկերն է: Պատկերից վերեւ առկա է նարնջագույն ցիրկոնով ձեւավորված աստղ: Ներքեւի աջ մասում պատկերված է երկվորյակների կենդանակերպի նշանի խորհրդանիշը: Ամբողջը եզերված է գծավոր շրջանագծով: Շրջանագծի եւ եզրաշուրթի միջեւ վերեւում լատիներեն, իսկ ներքեւում ռուսերեն նշված է համաստեղության անվանումը համապատասխանաբարՙ «GEMINI» եւ «БЛИЗНЕЦЫ»:
Հուշադրամը շրջանագծով երկու կողմից ունի ուռուցիկ եզրաշուրթ:
Դարձերեսի դաշտի ձեւավորման համար օգտագործվել են գունավոր ներկեր: Հուշադրամի ուրվագծերի հեղինակն է Ու. Վալեժակը: Հուշադրամը դրվագվել է Լեհաստանի դրամահատարանում:
Հուշադրամի բնութագիրը.
| Անվանական արժեքը | 100 դրամ |
| Մետաղը եւ հարգը | արծաթ, 925 0 |
| Զանգվածը | 28,28 գ |
| Տրամագիծը | 38,61 մմ |
| Որակը | լավացված |
| Դրամաշուրթը | հարթ |
| Տպաքանակը | 12000 հատ |
ԿԲ մամուլի ծառայություն