Թուրքիայի էներգետիկայի նախարար Հիլմի Գուլերը պաշտոնապես երկրի առաջին ատոմակայանի կառուցման մրցույթ է հայտարարել, հաղորդում է Ֆրանսպրես գործակալությունը: Ենթադրվում է, որ 4000 մեգավատտ հզորությամբ ԱԷԿ-ը կկառուցվի Մերսինի նահանգում, միջերկրածովյան այդ նավահանգստի մոտակայքում:
Տվյալ պարագան արդեն բնապահպանների բողոքներն է հարուցել: Մինչդեռ Թուրքիայի իշխանությունները մտադիր են մինչեւ 2013 թվականը երկրի ատոմակայանների թիվը հասցնել 3-ի:
Պետական TETAS էներգաընկերությունը առաջին ատոմակայանի շինարարության հայտեր կընդունի մինչեւ սեպտեմբերի 24-ը: Նախարար Գուլերի խոսքերով, նախագիծը լիովին կիրականացվի մասնավոր ներդրումների հաշվին: 2007-ին ատոմային էներգետիկայի վերաբերյալ ընդունված օրենքի համաձայն, պետությունը երաշխավորում է յուրաքանչյուր կայանի էլեկտրաէներգիայի գնումները դրա բացմանը հաջորդող 15 տարվա ընթացքում:
Ռուսական «Ատոմստրոյէքսպորտ» ընկերությունում Ինտերֆաքս գործակալության թղթակցին հայտնել են, որ ընկերությունը մտադիր է մասնակցել մրցույթին եւ թուրքերին կառաջարկի 100 Մգվտ հզորությամբ ջրաջրային էներգետիկ ռեակտորների վրա հիմնված նախագիծ: Ավելի վաղ ընկերության ղեկավար Սերգեյ Շմատկոն հայտարարել էր, որ Թուրքիայում ռուսների մրցակիցը կարող է դառնալ Կանադան, որն առաջարկել է ծանր ջրով գործող CANDU տիպի ռեակտոր: