ԳԱԼԱ հեռուստաընկերության պաշտպանության մարաթոնով մարտի 25-ին հավաքվեց ողջ պահանջվող գումարը: ԴԱՀԿ աշխատակիցները հարկային տեսչության պահանջած գումարը ստանալու վերջին ձեւակերպումներն էին անում: Անհրաժեշտ գումարը կազմում էր 26.899.986 դրամ (մոտ 86 700 ԱՄՆ դոլար): Այսպիսով, ԳԱԼԱ-ն խուսափեց իր ունեցվածքի վաճառքի հեռանկարից եւ հնարավորություն ունի շարունակելու հեռարձակումը:
ԳԱԼԱ ընկերության դեմ պետական մարմինների հալածանքները սկսվել էին 2007-ի հոկտեմբերից, երբ այս կայանը սկսեց լայնորեն լուսաբանել նախագահության համար առաջադրվող Լեւոն Տեր-Պետրոսյանի ելույթները: 2007-ի նոյեմբերի 12-ին հարկային տեսչությունը ԳԱԼԱ-ի սեփականատեր «ՉԱՊ» ՍՊԸ-ին ներկայացրեց հարկային պահանջների ակտ, նոյեմբերի 26-ին հարկային տեսչությունը այդ հայցով դիմեց Տնտեսական դատարան: ԳԱԼԱ-ի պաշտպանության շտաբը նախատեսում է բողոքարկել դատարանի վճիռը, ընդհուպ Եվրոպական դատարան, քանի որ համարում են, որ այս գործում խախտվել են մարդու իրավունքների եվրոպական կոնվենցիայի առնվազն երկու հոդվածներ: