Քիքբոքսինգի ՀՀ հավաքականը մարտի 30-ից ապրիլի 6-ը Խարկովում կմասնակցի Եվրոպայի գավաթի խաղարկությանը, որտեղ հանդես կգան 32 երկրների մարզիկներ: Այս մասին երեկ «Հայացք» ակումբում կայացած մամուլի ասուլիսում տեղեկացրեց մարզաձեւի Հայաստանի ֆեդերացիայի նախագահ Գառնիկ Հայրապետյանը: Ինչպես ֆեդերացիայի նախագահը, այնպես էլ հավաքականի գլխավոր մարզիչ Արթուր Արշակյանը հույս հայտնեցին, որ մեր մարզիկները հաջող հանդես կգան առաջիկա մրցումներում: Լավատեսության համար հիմք են այս տարվա փետրվարի 24-ից մարտի 2-ը Ուկրաինայի Բրովարի քաղաքում տեղի ունեցած քիքբոքսինգի աշխարհի առաջնության նախընտրական փուլում մեր մարզիկների հաջող մրցելույթները: Մեր քիքբոքսինգիստները հիանալի ելույթ ունեցանՙ նվաճելով 4 ոսկե, 3 արծաթե եւ մեկ բրոնզե մեդալ:
Ֆեդերացիայի նախագահը տեղեկացրեց, որ Եվրոպայի գավաթի խաղարկությանը մասնակցելու համար քիքբոքսինգիստներին մեծ աջակցություն են ցուցաբերել ՀՀԿ խմբակցության ղեկավար, ԱԺ պատգամավոր Կարեն Կարապետյանը, ինչպես նաեւ Երեւանի քաղաքապետ Երվանդ Զախարյանն ու ՀՀ գլխավոր դատախազ Աղվան Հովսեփյանը:
Քիքբոքսինգի Հայաստանի ֆեդերացիան 2008-ին իրականացնելու մեծ ծրագրեր ունի: Դրանցից մեկն արդեն կյանքի է կոչվել: ՀՀ պաշտպանության նախարարության հետ համաձայնություն է ձեռք բերվել մարզաձեւը զորամասերում արմատավորելու հարցում: Ներկայում շաբաթական 3 անգամ մարզիչները պարապմունքներ են անցկացնում տարբեր զորամասերի զինվորների հետ: 7-8 ամիս պարապելուց հետո նախատեսվում է քիքբոքսինգի առաջնություն անցկացնել տարբեր զորամասերի ներկայացուցիչների մասնակցությամբ:
Ներկայում հանրապետությունում կան քիքբոքսինգի 42 մարզիչներ, 20 մրցավարներ, 2800 մարզիկներ: Արդեն 10 տարի է, ինչ գործում է քիքբոքսինգի մանկապատանեկան մարզադպրոցը, որը կադրեր է պատրաստում: Աշխատանքներ են տարվում 2012-ի աշխարհի առաջնությունը Երեւանում անցկացնելու ուղղությամբ: Մարզաձեւի հանրապետական ֆեդերացիան 2004-ին անդամակցել է քիքբոքսինգի միջազգային ֆեդերացիային, 2006-ին դարձել է եվրոպական ֆեդերացիայի անդամ, իսկ 2008-ինՙ Ասիայի խորհրդի անդամ:
ԱՇՈՏ ՀԱՅՐԱՊԵՏՅԱՆ