Ապրիլի 20-ին, ժամը 15.10-ին տեղեկություն է ստացվել, որ Սեւանա լճումՙ Չկալովկա գյուղի ափամերձ հատվածից երկու մետր հեռավորության վրա հայտնաբերվել է կնոջ դիակ, եւ այն ջրից դուրս բերելու համար անհրաժեշտ է փրկարարների օգնությունը: Ժամը 15.25-ին ջրափրկարարները ջրից դուրս են բերել 60-65 տարեկան, անձը չպարզված կնոջ դիակ եւ հանձնել ոստիկանության աշխատակիցներին:
Դիակի հայտնաբերում
Ապրիլի 20-ին, ժամը 17.28-ին ահազանգ է ստացվել, որ Երեւանի Բագրատունյանց պողոտայի 20-րդ շենքի թիվ 48 բնակարանի բնակիչը չի արձագանքում ոչ հեռախոսի, ոչ էլ դռան զանգերին: Դեպքի վայր մեկնած փրկարարները, բացելով բնակարանի դուռը, ներսում հայտնաբերել են 1923-ին ծնված Խաչիկ Այվազյանի դիակը:
Ցրտահարվել են մշակաբույսերը
Արագածոտնի մարզի Թալինի տարածաշրջանում ապրիլի 17-ի լույս 18-ի գիշերը, ջերմաստիճանի կտրուկ նվազեցման հետեւանքով ցրտահարվել են գյուղատնտեսական մշակաբույսերը:
Խեղդամահ է արել
Ապրիլի 20-ին ՀՀ արդարադատության նախարարության «Նուբարաշեն» քրեակատարողական հիմնարկից ոստիկանության Մալաթիայի բաժնում հաղորդում է ստացվել, որ մեղայականով ներկայացել է 1937-ին ծնված Գերասիմ Հ.-ն եւ հայտարարել, որ 4-րդ գյուղի ծերանոցում մարդ է խեղդամահ արել: Գերասիմ Հ.-ն բերման է ենթարկվել բաշին, որտեղ հայտնել է, որ ապրիլի 19-ի երեկոյան, իր սենյակում խեղդամահ է արել նույն տուն-ինտերնատի բնակիչ, 1947-ին ծնված Միքայել Խաչատրյանին: Մեկնած օպերատիվ խումբը հաղթանակ գյուղում գտնվող տուն-ինտերնատի թիվ 304 սենյակում հայտնաբերել է Մ. Խաչատրյանի դիակը: Կատարվում է նախաքննություն:
Ավազակային հարձակում եւ զոհ
Ապրիլի 20-ին, ժամը 14.30-ին ոստիկանության Էրեբունու բաժնում հաղորդում է ստացվել, որ Ավանեսովի փողոցի 20 շենքի բնակարաններից մեկում ավազակային հարձակում է կատարվել: Մեկնած օպերատիվ խումբը պարզել է, որ նույն օրը, ժամը 10-ից մինչեւ 14.30-ն ընկած ժամանակահատվածում, անհայտ անձը դեռեւս չպարզված եղանակով մուտք է գործել բնակարան եւ էլեկտրալարը պարանոցին փաթաթելու միջոցով խեղդամահ արել 1975-ին ծնված Նարինե Հ.-ին եւ հափշտակելով 220.000 դրամ արժողության ոսկյա զարդերՙ դիմել փախուստի: Կատարվում է նախաքննություն:
ՄԱՐԻԵՏԱ ՄԱԿԱՐՅԱՆ