Ապակայունացումն առաջինն ազդեց անշարժ գույքի շուկայի վրա
Այս տարվա մարտին Հայաստանի անշարժ գույքի շուկայում իրականացվել է մոտ 13 հազար գործարք, որը գերազանցում է փետրվարին կատարված գործարքները 2,3 տոկոսով, իսկ նախորդ տարվա մարտինըՙ 4 տոկոսով: Ինչպես հայտնի դարձավ անշարժ գույքի կադաստրի պետական կոմիտեի շուկայի վերլուծությունից, գործարքներից 4173-ը օտարման գործարքներն են, որոնց մեջ գերակշռում են առուվաճառքի գործարքները եւ փոքր մասն են կազմում նվիրատվություններն ու փոխանակությունները: Այս տարվա մարտին իրականացված անշարժ գույքի օտարման գործարքների մոտ 31 տոկոսն արձանագրվել է Երեւանում: Մայրաքաղաքում առուվաճառքի գործարքների 63,8 տոկոսն արձանագրվել է բազմաբնակարան շենքերի բնակարանների նկատմամբ:
Ինչ վերաբերում է գներին, ապա վերջին մի քանի տարվա մեջ առաջին անգամ մայրաքաղաքում փետրվարի համեմատ միջին գները նվազել են 0,2 տոկոսով: Սովորաբար վերջին 4 տարիներին միջին ամսական գնաճն այստեղ կազմում էր 1-3 տոկոս: Ակնհայտ է, որ նախագահական ընտրություններին հաջորդած, նախագահի թեկնածու Լեւոն Տեր-Պետրոսյանի մարտի 1-ին հրահրած անկարգություններն ազդել են ապակայունացման դեպքում ամենազգայունՙ անշարժ գույքի շուկայի վրա: Այս ցուցանիշն առայժմ միտում դառնալու նշաններ ցույց չի տալիս, բայց անկասկած է, որ առաջիկայում անշարժ գույքի շուկան ավելի զգայուն է դառնալու անգամ ավելի պակաս վտանգավոր դեպքերից հետո, քան մարտի 1-ին էր: Այսպիսով, ըստ համայնքների, Երեւանում բնակարանների 1 քմ մակերեսի միջին շուկայական գները մարտին այսպիսին են եղել.
Միջին գները (դրամ)
| Համայնքներ | մարտ 2007թ. | մարտ 2008թ. | փետրվար 2008թ. |
| Կենտրոն | 422800 | 466000 | 476100 |
| Արաբկիր | 330600 | 395600 | 387800 |
| Քանաքեռ-Զեյթուն | 239300 | 296900 | 299200 |
| Նոր Նորք | 215800 | 263200 | 259400 |
| Ավան | 199400 | 260000 | 262100 |
| Էրեբունի | 208300 | 258000 | 261500 |
| Շենգավիթ | 222800 | 266900 | 270700 |
| Դավթաշեն | 228500 | 275000 | 278300 |
| Աջափնյակ | 214200 | 269900 | 263100 |
| Մալաթիա-Սեբաստիա | 199100 | 255200 | 256000 |
| Նուբարաշեն | 118800 | 146700 | 146700 |
| Միջինը Երեւանում (բացի Նորք-Մարաշից) | 236300 | 286700 | 287400 |
Մարզերում, բացառությամբ Երեւանի, բնակարանների միջին գներն աճել են 1,8 տոկոսով: Երեւանից հետո ամենաթանկ բնակարաններն Աբովյանում են, որտեղ 1 քմ մակերեսի շուկայական գինը մարտին կազմել է 161 հազար դրամ, Վաղարշապատում (Էջմիածնում)ՙ 159 հազար դրամ, Ծաղկաձորումՙ 142 հազար դրամ: Ապա գալիս են Մասիսըՙ 1 քմ-նՙ 124 հազար դրամ, Ջերմուկըՙ 123 հազար դրամ, Նոր Հաճընըՙ 117 հազար դրամ, Աշտարակըՙ 116 հազար դրամ:
Մայրաքաղաքում արձանագրված անհատական տների առուվաճառքի գործարքների ցուցանիշների վերլուծությունից պարզվել է, որ այստեղ միջին գները մարտին փետրվարի համեմատ աճել են 1,1 տոկոսով: Միջինացվածՙ 250 քմ շինության մակերես եւ 400 քմ տնամերձ ունեցող անհատական տների միջին 1 քմ-ի միջին գներն ըստ համայնքների Երեւանում կազմել են.
Միջին գները (դրամ)
| Համայնքներ | մարտ 2007թ. | մարտ 2008թ. | փետրվար 2008թ. |
| Կենտրոն | 432200 | 487700 | 486100 |
| Արաբկիր | 341200 | 402700 | 395300 |
| Քանաքեռ-Զեյթուն | 244500 | 308700 | 307700 |
| Նորք-Մարաշ | 219100 | 272600 | 266300 |
| Ավան | 203300 | 271000 | 267000 |
| Էրեբունի | 217000 | 267600 | 266600 |
| Շենգավիթ | 225800 | 274700 | 273700 |
| Դավթաշեն | 239200 | 289700 | 288200 |
| Աջափնյակ | 217800 | 276300 | 268700 |
| Մալաթիա-Սեբաստիա | 202700 | 268700 | 265900 |
| Նուբարաշեն | 121500 | 156100 | 150300 |
| Միջինը Երեւանում (բացի Նոր Նորքից) | 242200 | 297800 | 294200 |
Մարզերում միջինացված են 200 քմ շինության եւ 1000 քմ տնամերձ մակերեսով անհատական տների գները: Այստեղ միջին գներն ավելացել են 2,1 տոկոսով: Ամենաթանկ անհատական տները Ծաղկաձորում ենՙ 1 քմ-նՙ 209 հազար դրամ, երկրորդը Աբովյանն է, որտեղ 1 քմ-ն կազմել է 166 հազար դրամ: Երրորդը Վաղարշապատն է 1 քմ-նՙ 161 հազար դրամ, այնուհետեւ Մասիսըՙ 126 հազար դրամ, Նոր Հաճընըՙ 122 հազար դրամ, Աշտարակըՙ 121 հազար դրամ:
ԱՐԱ ՄԱՐՏԻՐՈՍՅԱՆ