Երեւան-Գյումրի ավտոճանապարհային 83-րդ կմ-ում կիրակի օրը տեղի է ունեցել ճանապարհատրանսպորտային պատահար։ 1982-ին ծնվ. Հովսեփ Չիվաշյանին պատկանող «ԳԱԶԵԼ» մակնիշի 06 00 506 պետհամարանիշով ավտոմեքենան դուրս է եկել ճանապարհից եւ շրջվել։ Վարորդը եւ ավտոմեքենայում գտնվող 10 ուղեւորներից 6-ը տարբեր աստիճանի մարմնական վնասվածքներով տեղափոխվել են Գյումրիի Գյուլբենկյանի անվան հիվանդանոց։
Ուժեղ քամին մեծ վնասներ է հասցրել
Հանգստյան օրերին, երեկոյան ժամերին ուժեղ քամու հետեւանքով վնասվել են Արագածոտնի մարզի Վարդենիս գյուղի դպրոցի եւ 12 տան տանիքներ։ Բարեբախտաբար տուժածներ չկան։ կոտայքի մարզի Ներքին Քաղսի գյուղի Սբ. Աստվածածին եկեղեցու տանիքըՙ 250 քմ մակերեսով, հիմնովին վնասվել է ապրիլի 25-ին, ժամը 17.10-ի սահմաններում ուժեղ քամու հետեւանքով։ Տուժածներ չկան։
Պայթյուն ավտոմեքենան լիցքավորելիս
Ապրիլի 27-ին ոստիկանության Վաղարշապատի բաժնում հիվանդանոցից հաղորդում է ստացվել, որ ձախ ոտքի վնասվածքով իրենց մոտ է տեղափոխվել 1977-ին ծնվ. Արմեն Տ.-ն։ Պարզվել է, որ Էջմիածին-Երեւան ճանապարհին գտնվող ավտոգազալցակայանում Մանվել Ա.-ի «ԳԱԶ-31029» մակնիշի ավտոմեքենան լիցքավորելիս գազի բալոնը պայթել է, ինչի հետեւանքով լիցքավորող Արմեն Տ.-ն ստացել է վերը նշված վնասվածքները։ Կատարվում է նախաքննություն։
ՄԱՐԻԵՏԱ ՄԱԿԱՐՅԱՆ