Ֆուտբոլի Հայաստանի բարձրագույն խմբի առաջնության 4-րդ տուրում ուշադրության կենտրոնում էին գավաթի եզրափակիչի մասնակիցներ «Արարատի» եւ «Բանանցի» մասնակցությամբ հանդիպումները: «Արարատը» նախորդ երեք հանդիպումներում էլ հաղթանակներ էր տարել, իսկ ահա «Բանանցը» դեռեւս չէր ճաշակել հաղթանակի քաղցրությունը եւ չէր բացել գոլերի հաշիվը:
4-րդ տուրում երկու թիմերն էլ հաղթեցին, բայց հաղթանակները տարբեր կերպ տրվեցին: Գյումրիում արարատցիներն արդեն 18-րդ րոպեին բացեցին հաշիվը: Աչքի ընկավ Արթուր Պետրոսյանը: Երկրորդ խաղակեսում Մարկոսը կրկնապատկեց հաշիվը եւ չորրորդ անընդմեջ հաղթանակը տոնեց:
Իսկ ահա «Բանանցը» «Ուլիսի» հետ մրցավեճում հաղթանակը կորզեց հանդիպման վերջին րոպեին: Վնասվածքից ապաքինվելուց հետո առաջին անգամ խաղադաշտ մտած Արսեն Բալաբեկյանը հաղթանակ պարգեւեց «Բանանցին»ՙ նաեւ բացելով թիմի գոլերի հաշիվն ընթացիկ առաջնությունում:
Անդրանիկ հաղթանակը տոնեց նաեւ Կապանի «Գանձասարը»ՙ 2-1 հաշվով պարտության մատնելով առաջնության հետնապահ «Կիլիկիային»: Աչքի ընկան «Գանձասարի» վրաց լեգեոնականներ Գագա Թբիլաշվիլին ու Դավիթ Խանիշվիլին, որոնց հյուրերը պատասխանեցին Էդգար Խաչատրյանի խփած գոլով: Տուրի չորրորդ հանդիպումը «Միկայի» եւ «Փյունիկի» միջեւ չկայացավ: Ինչպես տեղեկացրել ենք, Հայաստանի մինչեւ 19 տարեկանների պատանեկան հավաքականը, որի կազմում մեծ թվով «Փյունիկի» ֆուտբոլիստներ են ընդգրկված, մեկնել է Իտալիա:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Արարատ | 4 | 4 | 0 | 0 | 10-0 | 12 |
| 2. Միկա | 3 | 3 | 0 | 0 | 9-2 | 9 |
| 3. Փյունիկ | 3 | 2 | 0 | 1 | 2-2 | 6 |
| 4. Շիրակ | 4 | 2 | 0 | 2 | 5-6 | 6 |
| 5. Բանանց | 4 | 1 | 1 | 2 | 1-2 | 4 |
| 6. Գանձասար | 4 | 1 | 1 | 2 | 4-6 | 4 |
| 7. Ուլիս | 4 | 1 | 0 | 3 | 3-4 | 3 |
| 8. Կիլիկիա | 4 | 0 | 0 | 4 | 1-13 | 0 |
Ռմբարկուները
| Նարեկ Բեգլարյան | «Միկա» | 5 |
| Մարկոս | «Արարատ» | 4 |
| Սարգիս Մովսիսյան | «Արարատ» | 3 |
| Արարատ Հարությունյան | «Շիրակ» | 2 |
| Տիագո | «Միկա» | 2 |
ԱՇՈՏ ՀԱՅՐԱՊԵՏՅԱՆ