Երեւանի «Արարատի» ֆուտբոլիստները շարունակում են իրենց հաղթական ելույթներն ընթացիկ առաջնությունում: 6-րդ տուրում նրանք հերթական հաջողությանը հասան Կապանումՙ 3-2 հաշվով առավելության հասնելով տեղի «Գանձասարի» նկատմամբ: Այդ խաղում էլ իրեն գերազանց դրսեւորեց «Արարատի» բրազիլացի ֆուտբոլիստ Մարկոսը: Արդեն 22-րդ րոպեին նա բացեց հաշիվը: Այդ գոլը ՀՀ առաջնություններում «Արարատի» հոբելյանականՙ 900-րդ գնդակն էր: Ընդմիջումից հետո արարատցիներն ամրապնդեցին իրենց առավելությունը: Նախ աչքի ընկավ Էդգար Սաֆարյանըՙ կրկնապատկելով հաշիվը: Թեեւ Վիրգին Մարշավելան 11 մ հարվածով կրճատեց հաշվի տարբերությունը, սակայն քիչ անց Մարկոսը 3-րդ գոլը խփեց: Խաղավերջում զգալ տվեց արարատցիների հոգնածությունը, որից օգտվելով էլ Բենիամին Մանուչարյանը կրկին կրճատեց հաշիվը: «Արարատը» 6-րդ անընդմեջ հաղթանակը տոնելովՙ վստահորեն գլխավորում է աղյուսակը:
«Արարատին» հետապնդող «Միկայի» ֆուտբոլիստները «Ուլիսի» հետ մրցավեճում միայն մեկ անգամ կարողացան գրավել մրցակցի դարպասը: Թիմին հաղթանակ պարգեւեց 18-րդ րոպեին Դիլշոդ Վասիեւի խփած միակ գոլը: Երկրի չեմպիոն «Փյունիկը» առաջնությունում խոշոր հաշվով անդրանիկ հաղթանակը տոնեցՙ 3-0 հաշվով առավելության հասնելով հետնապահի դերը ստանձնած «Կիլիկիայի» նկատմամբ: Հաշիվը 31-րդ րոպեին բացեց Կառլեն Մկրտչյանը, ապա 2 գոլ խփեց Գեւորգ Ղազարյանը: Տուրի չորրորդ հանդիպումը «Շիրակի» եւ «Բանանցի» միջեւ հետաձգվել է, քանի որ վերջինիս չորս ֆուտբոլիստներ մինչեւ 19 տարեկանների ՀՀ պատանեկան հավաքականի կազմում նախապատրաստվում են առաջիկա մրցաշարին:
Առաջնությունում այժմ ընդմիջում է հայտարարված, որի ընթացքում Հայաստանի մինչեւ 19 տարեկանների պատանեկան հավաքականը կմասնակցի Եվրոպայի առաջնության ընտրական մրցաշարի էլիտար խմբի մրցաշարին, իսկ ազգային հավաքականը մայիսի 28-ին եւ հունիսի 1-ին ընկերական մրցախաղեր կանցկացնի Մոլդովայի եւ Հունաստանի ընտրանիների հետ: Այդ պատճառով մայիսի 30-ին նշանակված «Արարատ»-«Փյունիկ» հանդիպումը կհետաձգվի:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Արարատ | 6 | 6 | 0 | 0 | 15-3 | 18 |
| 2. Միկա | 5 | 4 | 0 | 1 | 11-4 | 12 |
| 3. Փյունիկ | 5 | 3 | 1 | 1 | 6-3 | 10 |
| 4. Շիրակ | 5 | 3 | 0 | 2 | 6-6 | 9 |
| 5. Բանանց | 5 | 2 | 1 | 2 | 5-4 | 7 |
| 6. Գանձասար | 6 | 1 | 2 | 3 | 7-10 | 5 |
| 7. Ուլիս | 6 | 1 | 0 | 5 | 3-6 | 3 |
| 8. Կիլիկիա | 6 | 0 | 0 | 6 | 3-20 | 0 |
Ռմբարկուները
| Մարկոս | «Արարատ» | 7 |
| Նարեկ Բեգլարյան | «Միկա» | 5 |
| Սարգիս Մովսիսյան | «Արարատ» | 3 |
| Էդգար Սաֆարյան | «Արարատ» | 3 |
| Գեւորգ Ղազարյան | «Փյունիկ» | 3 |
ԱՇՈՏ ՀԱՅՐԱՊԵՏՅԱՆ