Երեկ հրաշալի լուր ստացանք Կանադայիցՙ հայաստանցի 19-ամյա դաշնակահարուհի Նարե Արղամանյանն արժանացել է Մոնրեալի միջազգային մրցույթի առաջին դափնեկրի («Գրան պրի») կոչմանը: 23 մասնակիցների մեջ, որոնց շարքում էին դաշնակահարներՙ Ռուսաստանից, Մ. Նահանգներից, Կանադայից, Ճապոնիայից եւ այլ երկրներից, Նարեն, ինչպես գրում է կանադական հայտնի The Gazette թերթը, դյուրությամբ է արժանացել այդ մրցանակին եւ ստացել 30.000 դոլարի պարգեւը: Բոլոր մրցակիցներից ամենաերիտասարդըՙ Նարեն համբուրգյան Ստեյնուեյ դաշնամուրի վրա եւ Ժան-Մարի Զեյթունիի ղեկավարած Մետրոպոլիտեն նվագախմբի նվագակցությամբ նվագել է Չայկովսկու հանրածանոթ Դաշնամուրի թիվ 1 կոնցերտն ու հիացրել բոլորինՙ թե՛ ժյուրիի անդամներին, թե՛ ունկնդիրներին:
Հիշեցնենք, որ Նարե Արղամանյանը «նոր անուններ» հայաստանյան հայտնի խմբի սաներից էր, վերջին տարիներին իր արվեստը կատարելագործում է Վիեննայում, հայտնի վարպետների մոտ:
Երկրորդ մրցանակին տիրացել են միանգամից երկու դաշնակահարներՙ Ալեքսանդր Մուտուզկինըՙ Ռուսաստանից եւ Մասատաքա Տաքադանՙ Ճապոնիայից: Երրորդ մրցանակ չի տրվել: