Երկշաբաթյա ընդմիջումից հետո վերսկսվեց ֆուտբոլի Հայաստանի բարձրագույն խմբի առաջնությունը: Սակայն 7-րդ տուրում ընդամենը երկու խաղ կայացավ: Ազգային հավաքականի ընկերական մրցախաղերով պայմանավորված «Արարատ»-«Փյունիկ» եւ «Բանանց»-«Միկա» հանդիպումները հետաձգվել են: Ի դեպ, նույն պատճառաբանությամբ, հետաձգվել են նաեւ հունիսի 4-ին նշանակված «Բանանց»-«Գանձասար», «Ուլիս»-«Փյունիկ» եւ «Կիլիկիա»-«Արարատ» մրցախաղերը:
Իսկ այժմ անդրադառնանք 7-րդ տուրում կայացած երկու խաղերին: Գյումրիում «Շիրակը» հյուրընկալել էր առաջնության հետնապահ «Կիլիկիային», որի ղեկը ստանձնել է Էդուարդ Մարգարովը:
Փորձառու մասնագետի նորամուտը հաջող անցավ: «Կիլիկիան» 2-0 հաշվով անդրանիկ հաղթանակը տոնեց: Հաշիվը 14-րդ րոպեին բացեց շիրակցի Հրաչյա Մնացականյանը` գնդակն ուղարկելով սեփական դարպասը: 10 րոպե անց Ռաֆայել Մկրտչյանը կրկնապատկեց հաշիվը:
«Ուլիսը» սեփական հարկի տակ հյուրընկալել էր «Գանձասարին»: Հանդիպման ելքը վճռեց ուլիսցի Արտյոմ Ադամյանի խփած միակ գնդակը: «Ուլիսն» առաջնությունում երկրորդ հաղթանակը տոնեց:
ԱՇՈՏ ՀԱՅՐԱՊԵՏՅԱՆ