System of a Down հանրահայտ խմբի նախկին ղեկավար Սերժ Թանգյանը հայտնել է, որ ԱՄՆ-ում աշնանը կայանալիք նախագահական ընտրություններում սատարելու է դեմոկրատների թեկնածու Բարաք Օբամային, հաղորդում է «Ազատություն» ռադիոկայանը: Ամերիկահայ երաժիշտը այս հայտարարությունն արել է Մոսկվայում, որտեղ շոու է կազմակերպել իր առաջին անհատական ալբոմը գովազդելու նպատակով: Բարաք Օբաման օրերս վերահաստատել է, որ նախագահ դառնալու դեպքում ճանաչելու է Հայոց ցեղասպանությունը:
Մանկավարժական համալսարանի ռեկտորը վերընտրվեց
Երեւանի «Խ. Աբովյանի անվան հայկական պետական մանկավարժական համալսարան» ՊՈԱԿ-ի ռեկտորի պաշտոնում ընտրվել է Արտուշ Ղուկասյանը: Այս մասին ՀՀ կառավարության այսօրվա նիստում նշեց ՀՀ կրթության եւ գիտության նախարար Սպարտակ Սեյրանյանը` ներկայացնելով մրցույթի արդյունքները, որոնք ՀՀ կառավարությունը հավանության արժանացրեց: ՀՀ կրթության եւ գիտության նախարարին հանձնարարվեց ՀՀ օրենսդրությամբ սահմանված կարգով Ա. Ղուկասյանի հետ կնքել աշխատանքային պայմանագիր` 5 տարի ժամկետով, հաղորդում է Արմենպրեսը:
Բրյուսելում քննարկվում է ղարաբաղյան հարցը
ԵԱՀԿ Մինսկի խմբի ֆրանսիացի համանախագահ Բեռնար Ֆասիեն Բրյուսելում հանդիպումներ է անցկացնում Եվրոմիության պաշտոնատար անձանց հետ:
Ինչպես հաղորդում է ԱՊԱ-ն, հանդիպումներում քննարկվում է ղարաբաղյան հակամարտության կարգավորման գործընթացը: Ֆրանսիացի միջնորդը քննարկումներ կանցկացնի նաեւ հունիսի վերջինՙ համանախագահների Հայաստան եւ Ադրբեջան սպասվող այցի առնչությամբ, հաղորդում է «Նոյյան տապանը»: