Պաշտոնավարության հարյուր օրվա կապակցությամբ նախագահ Սերժ Սարգսյանի մամլո գրասենյակը տարածել է նախագահի ուղերձը, ուր նա խոսում է ներքին եւ արտաքին քաղաքականության, անվտանգության եւ զինված ուժերի կատարելագործման, ոստիկանության ու դատական համակարգի գործունեության, արդյունավետ տնտեսական քաղաքականության, այդ թվում` հարկային ու մաքսային մարմինների աշխատանքի մասին:
«Ես սկսել եմ իրականացնել իմ ծրագիրը, որը ձեզնից շատերի հավանությանն է արժանացել եւ ներառում է կարեւոր ու կոնկրետ խնդիրների լուծումներ, մասնավորապես ասված է ուղերձում: Անցած հարյուր օրերը ցույց տվեցին, որ դրանց մի մասը կիրականացնենք շատ ավելի արագ, քան ենթադրում էինք, մյուսների համար ավելի տեւական ժամանակ է անհրաժեշտ: Տեւական, բայց ոչ ավելին, քան ծրագրել ենք»: ՀՀ նախագահը իր ցանկությունն է հաղորդում` «օր առաջ լուծված տեսնել մեր խնդիրներըՙ անարդարության, անտարբերության, կոռուպցիայի ու աղքատության դեմ պայքարի դրական արդյունքները»: Նա նաեւ հավաստիացնում է. «Մեր աշխատանքը չի սահմանափակվելու ոչ մի «հարյուր օրով»: Այս գործելաոճը դարձնելու ենք կյանքի բնականոն նորմ»:
Ս. Մ.