Ըստ Ազգային անվտանգության խորհրդի քարտուղար Արթուր Բաղդասարյանի, այդ օրերին նվազեցին ներկրումները, արտահանումները, երկիրը կրեց լուրջ տնտեսական վնասներ: Տրանսպորտի եւ էներգետիկ դիվերսիֆիկացիայի խնդիրները պետության անվտանգության համար ունեն ռազմավարական նշանակություն: Իրանի հետ երկաթգծի կառուցումը, ըստ նրա, տրանսպորտային դիվերսիֆիկացիային ուղղված քայլ է: Ա. Բաղդասարյանը գոհունակություն հայտնեց հարեւան Իրանի կեցվածքի առնչությամբ. պատերազմական իրադարձությունների հետեւանքով Վրաստանի տարածքում կուտակված բեռներից կարեւորագույն նշանակություն ունեցող վառելիքի ու հացահատիկի պաշարները Հայաստան եկան Իրանի տարածքով: Ներկայումս աշխատանքներ են տարվում Հայաստան-Իրան-Ռուսաստան եռակողմ համագործակցությամբ երկաթուղու կառուցման շուրջը: Իրան-Հայաստան երկաթգծի կառուցման ֆինանսավորման ծավալը, որտեղ նաեւ կա ռուսական կողմի հետաքրքրությունը, մոտ 1-1,5 միլիարդ դոլար է, ներկայումս ուսումնասիրվում է նախագծի կյանքի կոչման հնարավորության հարցը: