Ռուսական «Զարուբեժ էքսպո» եւ հայկական «Մուլտի գրուպ» ընկերությունների նախաձեռնությամբ երեկ Երեւանում բացվեց EXPO RUSSIA արդյունաբերական ցուցահանդեսը, որը կտեւի մինչեւ նոյեմբերի 2-ը: Բացման խոսքով հանդես եկան Ռուսաստանի առեւտրաարդյունաբերական պալատի նախագահ Իգոր Կորոտինը եւ «Մուլտի գրուպի» նախագահ Գագիկ Ծառուկյանը :
Ցուցահանդեսն այս տարվա մայիսին Ծաղկաձորում տեղի ունեցած հայ-ռուսական գործարար համաժողովի տրամաբանական շարունակությունն է եւ նպատակ ունի ամրապնդելու երկու երկրների տնտեսական կապերը, զարգացնելու համատեղ բիզնես ծրագրերը: Այս առնչությամբ «Զարուբեժ էքսպո» ընկերության տնօրենների խորհրդի նախագահ Դավիթ Վարդանովն այն կարծիքը հայտնեց, որ Հայաստանում EXPO RUSSIA արդյունաբերական ցուցահանդեսը հսկայական դեր կկատարի մեր երկու երկրների առեւտրատնտեսական կապերի զարգացման ուղղությամբ եւ կդառնա ամենամյա գործարար հարթակ:
Ցուցահանդեսին ներկայացված են ռուսական ավելի քան 50 ընկերություններ, որոնց թվումՙ «Ուրանովիյ հոլդինգ ԱՐՄԶ»-ը, «Ատոմէներգոպրոմը», «Ռուսական ավտոբուսներ» կենտրոնական առեւտրային տունը» (ԳԱԶ խումբ), «ԵվրոսիբԷներգոինժիներինգը» եւ այլն, որոնք ներկայացնում են Մոսկվան, Ս. Պետերբուրգը, Դոնի Ռոստովը, Չելյաբինսկը, Մագնիտոգորսկը, Սամարան, Վորոնեժը, Նիժնի Նովգորոդը եւ ռուսաստանյան այլ քաղաքներ:
Հայաստանում EXPO RUSSIA-ի կազմակերպմանն աջակցել են Հայաստանի եւ Ռուսաստանի համապատասխան նախարարությունները, գործարարներին միավորող կառույցներն ու հասարակական կազմակերպությունները (այդ թվումՙ Ռուսաստանի հայերի միությունը):
Ա. Մ.