Նախագահ Սերժ Սարգսյանը Ֆրանսիա կատարած աշխատանքային այցի երկրորդ օրվա առավոտյան հանդիպել է վարչապետ Ֆրանսուա Ֆիյոնի հետ: Վերջինս բարձր է գնահատել երկու երկրների միջեւ առկա պատմական խոր հարաբերությունները, կարեւորել է հայ համայնքի դերը հայ-ֆրանսիական կապերի ամրապնդման գործում: Նախագահը ներկայացրել է Հայաստանի մոտեցումները տարածաշրջանում տեղի ունեցող վերջին իրադարձություններին, ԼՂ հիմնախնդրի ներկա իրավիճակը եւ դրա կարգավորման վերաբերյալ օրերս Մոսկվայում ստորագրված եռակողմ հռչակագրի մանրամասները, ինչպես նաեւ հայ-թուրքական հարաբերությունների մերձեցմանը միտված քայլերը: Ֆրանսիայի Սենատի նախագահ Ժերար Լարշեն 30-րդ օրն է, ինչ ստանձնել է այդ պաշտոնը, եւ ՀՀ նախագահն առաջին երկրի ղեկավարն էր, որ հանդիպեց նրա հետ: Ս. Սարգսյանը կարեւորել է միջխորհրդարանական համագործակցության հետագա խորացումը` գոհունակություն հայտնելով առկա համագործակցության բարձր մակարդակից: Այդ հարաբերությունները որակվել են որպես շատ կարեւոր բաղկացուցիչ` երկու ժողովուրդների միջեւ բարեկամական կապերի հետագա խորացման համար: Ֆրանսիայի վարչապետի եւ Սենատի նախագահի հետ հանդիպումներից հետո ՀՀ նախագահը հանդիպում է ունեցել նաեւ աշխարհահռչակ շանսոնիե Շառլ Ազնավուրի հետ: Օրվա երկրորդ կեսին ՀՀ նախագահը հանդիպել է Ֆրանսիայի իր գործընկեր Նիկոլա Սարկոզիի հետ, իսկ երեկոյան մեկնել Բրյուսել: