Իրանի Իսլամական Հանրապետությունում տեղական մարմին ստեղծելու հնարավորությունները ուսումնասիրելու նպատակով երկօրյա այցով Իրան է մեկնել «Հայաստան» համահայկական հիմնադրամի աշխատանքային խումբըՙ գործադիր տնօրենի պաշտոնակատար Արա Վարդանյանի գլխավորությամբ: Աշխատանքային խումբը հանդիպումներ կունենա Իրանում ՀՀ դեսպան Կարեն Նազարյանի, Թեհրանի թեմի առաջնորդ Սեպուհ արք. Սարգսյանի եւ Թեհրանի «Արարատ» մարզավանի ղեկավարության հետ:
Իրանում ներկայումս բնակվում է շուրջ 100 000 հայ: Տարեսկզբին հիմնադրամը Մեղրու շրջանի Շվանիձոր, Ալվանք եւ Նռնաձոր գյուղերում իրականացրել է ծրագրեր իրանահայության հովանավորությամբ: Արա Վարդանյանի համոզմամբ, Իրանում տեղական մարմնի հիմնումը մեծապես կնպաստի տեղի հայ համայնքի եւ հիմնադրամի համագործակցության ամրապնդմանը: