Հանրապետությունում փետրվարի 19 այսուհետեւ կնշվի որպես գիրք նվիրելու օր: Այդ օրը խորհրդանշական է, քանի որ լրանում է Հայոց մեծ բանաստեղծ Հովհաննես Թումանյանի ծննդյան 140-ամյակը:
ՀՀ մշակույթի նախարարությունում ստեղծված հոբելյանական հանձնաժողովը մշակել է միջոցառումների շարք Երեւանում եւ մարզերում: ՀԳ միությունը միանալով մշակույթի նախարարության նախաձեռնած գիրք նվիրելու օրվան, արդեն կուտակել է մեծաքանակ գրականությունՙ դպրոցներում, բուհերում, գրադարաններում գիրք նվիրելու միջոցառումը իրականացնելու համար: Ինչպես տեղեկացրեց ՀԳ միության նախագահ Լեւոն Անանյանը , գրքեր են տրամադրել «Զանգակ», «Արեւիկ» հրատարակչությունները, «Բուկինիստ» խանութը եւ ուրիշներ: Նախատեսվում է, որ հաջորդ տարի փետրվարին նույն միջոցառման շրջանակներում կանցկացվի «Լավագույն ընթերցող աշակերտ» մրցանակաբաշխություն:
Հովհ. Թումանյանի ծննդյան 140-ամյակին նվիրված միջոցառումների շրջանակներում Հայաստանի հանրակրթական ուսումնական հաստատություններում կկազմակերպվեն բաց դասեր, ներդպրոցական միջոցառումներ, ստեղծագործական մրցույթներ:
Ինչպես տեղեկացանք մշակույթի նախարարությունից, հոբելյանական միջոցառումների կիզակետը կլինի գրողի ծննդավայր Դսեղ գյուղը, որտեղ լոռեցիներին կայցելի «Գրադարան անիվների վրա» ծրագիրը: Այդ օրը Հայաստանի ազգային գրադարանը եւ «Գիրք» հիմնադրամը Լոռու գրադարանին կնվիրեն 140 անունՙ 200 միավոր գրականություն: Կկազմակերպվի նաեւ վերջին 10 տարիներին հրատարակված գրքերի, ալբոմների ցուցադրություն: Փետրվարի 19-ին Դսեղի տոնակատարությանը ներկա կլինի նաեւ Հովհաննես Թումանյանի 140-ամյակի նշումը նախապատրաստող հոբելյանական հանձնաժողովըՙ մասնակցությամբ ՀՀ նախագահ Սերժ Սարգսյանի:
Փետրվարի 19-20-ը ԵՊՀ Չարենցի անվան դահլիճում տեղի կունենա «Հովհաննես Թումանյանի հրապարակախոսությունը ժամանակի զուգահեռներում» գիտաժողովը: Այդ երկու օրերին մշակույթի նախարարությունը, Երեւանի քաղաքապետարանի աջակցությամբ Հյուսիսային համալսարանը եւ «Լոռվա ձոր» ՀԿ-ն կանցկացնեն Թումանյանի 140-ամյակին նվիրված գիտական նստաշրջանՙ «Թումանյանը եւ 21-րդ դարը» խորագրով: «Առնո Բաբաջանյան» համերգասրահում տեղի կունենա թումանյանական թեմաներով համերգային ծրագիր, իսկ գրողի տուն-թանգարանումՙ պարահանդես:
ՄԱՐԻԵՏԱ ՄԱԿԱՐՅԱՆ