Կաթոլիկ եպիսկոպոս Ռիչարդ Վիլյամսոնը ներողություն է խնդրել իր հրապարակային ելույթների համար, որոնց ընթացքում ինքը ժխտել է հրեաների ողջակիզման` Հոլոքոսթի փաստը: Այդ մասին հաղորդում է Ասոշիեյթեդ պրես գործակալությունը:
«Տիրոջով եմ երդվում, որ զղջում եմ ասածիս համար», հայտարարել է Վիլյամսոնը, ներողություն խնդրելով բոլոր նրանցից, ում վիրավորել են իր պնդումները:
Սուրբ Պիոս 10-րդի եղբայրության անդամ Ռիչարդ Վիլյամսոնը անցյալում քանիցս կարծիք էր հայտնել, թե նացիստների համակենտրոնացման ճամբարներում սպանվել է ոչ թե 6 մլն, այլ 200-300 հազար հրեա: Բացի դրանից, նա պնդել էր, թե ճամբարներում գազախցիկներ չեն օգտագործվել:
Վիլյամսոնն այդ պնդումներն արել էր Շվեդիայի հեռուստատեսության եթերում: Դրանից հետո Սուրբ Պիոս 10-րդի եղբայրության ղեկավարությունն աճապարել էր սահմանազատվել եպիսկոպոսից, հայտարարելով, թե նա արտահայտել է լոկ իր անձնական կարծիքը:
Հովհաննես Պողոս 2-րդ պապը Վիլյամսոնին հեռացրել էր կաթոլիկ եկեղեցուց, բայց 2009-ի հունվարի 24-ին Բենեդիկտոս 16-րդ պապը նրան վերադարձրել էր եկեղեցի, դրանով իսկ բողոքի ալիք բարձրացնելով հրեական միջավայրում: