Իսպանիայում ուսումնամարզական հավաք անցկացնող «Միկան» ստուգողական 2-րդ խաղում ուժերը չափեց ՈւԵՖԱ-ի գավաթակիր Սանկտ Պետերբուրգի «Զենիթի» հետ: Վերջինս նախապատրաստվում է մարտի 12-ին իտալական «Ուդինեզեի» հետ կայանալիք ՈւԵՖԱ-ի գավաթի 1/8 եզրափակիչ հանդիպմանը:
Այդ խաղում «Զենիթն» ավելի ուժեղ գտնվեց ու հաղթեց 2-1 հաշվով: Հանդիպումը շատ անհաջող սկսվեց «Միկայի» համար, որն արդեն 2-րդ րոպեին ստիպված էր խաղը վերսկսել դաշտի կենտրոնից: Վիկտոր Ֆայզուլինը գլխի հարվածով բացեց հաշիվը: Քիչ անց «Զենիթը» կարող էր 2-րդ գնդակը խփել: Իգոր Սեմշովի հարվածից հետո «Միկայի» դարպասապահ Արթուր Հարությունյանը գնդակը հետ մղեց, իսկ վրա հասած Շիրլը չկարողացավ գրավել դարպասը:
Առաջին խաղակեսն անցավ «Զենիթի» զգալի առավելությամբ: 18-րդ րոպեին Հարությունյանը որսաց Դանիի վտանգավոր հարվածը: Հաջորդ գրոհի ժամանակ «Զենիթի» խաղացող Կոնստանտին Զիրյանովը 2-րդ գնդակը խփեց, սակայն մրցավարն արձանագրեց «խաղից դուրս» վիճակ: Իսկ ահա «Միկան» ավելի հաջողակ գտնվեց: Թիմի գրոհներից մեկի ժամանակ 22-րդ րոպեին Աղվան Մկրտչյանը գնդակը տուգանային հարվածով բարձրից ուղարկեց հյուրերի տուգանային հրապարակ: Քամիլ Չոնտոֆալսկին չկարողացավ տիրել գնդակին եւ Նիկիտա Ֆուրսինը վերականգնեց հավասարակշռությունը:
37-րդ րոպեին «Զենիթը» կարող էր հաշվի մեջ կրկին առաջ անցնել, սակայն Դանիի տուգանային հարվածից հետո գնդակը դիպավ դարպասի հորիզոնական ձողին: Դրանից հետո Նարեկ Բեգլարյանի եւ Ալեքսի հարվածները հետ մղեց «Զենիթի» դարպասապահը: 56-րդ րոպեին «Զենիթի» թուրք հարձակվող Ֆաթիհ Թեքեն օգտվելով «Միկայի» պաշտպանի անփութությունից, խփեց 2-րդ գոլը, որը հաղթանակ պարգեւեց իր թիմին:
Այդ խաղում «Միկայի» մեկնարկային կազմն այսպիսին էր. Արթուր Հարությունյան, Նիկիտա Ֆուրսին, Ալեքս, Գեւորգ Պողոսյան, Աղվան Մկրտչյան, Էդնեյ, Ուլիսես Մոնտենեգրո Կանո, Պեդրո Խեսուս դե Տուդելո Լոպես, Իրակլի Ցանավա, Բոտի Դեմել, Արա Հակոբյան: Երկրորդ խաղակեսում թիմի գլխավոր մարզիչ Իվո Շուշակը մի շարք փոխարինումներ կատարեց: Մասնավորապես խաղադաշտ դուրս եկան Մաքսիմ Մորոզովը, Ստեփան Հակոբյանը, Արամ Ոսկանյանը, Հրաչյա Միքայելյանը, Տիագոն: Հաջորդ հանդիպումը նախատեսված է դանիական «Լյունբերգի» հետ, որից հետո «Միկան» պետք է ուժերը չափի Վլադիկավկազի «Ալանիայի» հետ: Թիմը Երեւան կվերադառնա մարտի 13-ին:
ԱՇՈՏ ՀԱՅՐԱՊԵՏՅԱՆ