«ԱԶԳ» ՕՐԱԹԵՐԹ

ԳՈՐԾԱՐՔՆԵՐԻ ՔԱՆԱԿԻ ՈՒ ԳՆԵՐԻ ՆՎԱԶՈՒՄ ԱՆՇԱՐԺ ԳՈՒՅՔԻ ՇՈՒԿԱՅՈՒՄ

Բնակարանների ու անհատական տների գներն իջել են ե՛ւ Երեւանում, ե՛ւ մարզերում

2009-ի hունվարը նշանավորվեց անշարժ գույքի շուկայում գործարքների նվազմամբ: Համաձայն անշարժ գույքի կադաստրի պետական կոմիտեիՙ շուկայի հունվար ամսվա վերլուծության տվյալների, Հայաստանի անշարժ գույքի շուկայում իրականացվել է 7277 գործարք, ինչը 49,6 տոկոսով պակաս է 2008-ի դեկտեմբերին կատարված գործարքների եւ 21,3 տոկոսով պակաս` 2008-ի հունվարին կատարվածների համեմատ: Օտարման գործարքները 2266-ն են, որոնց մեջ առուվաճառքներինը եղել է 76,5 տոկոսը, իսկ մնացածը նվիրատվություններն ու փոխանակություններն են: 2008-ի դեկտեմբերի համեմատ անշարժ գույքի օտարման գործարքների քանակը նվազել է 49,2 տոկոսով, իսկ անցյալ տարվա հունվարի համեմատ` 40,6 տոկոսով:

Մայրաքաղաքում առուվաճառքի գործարքների 58,6 տոկոսն արձանագրվել է բազմաբնակարան շենքերի բնակարանների նկատմամբ: Հունվարին, 2008-ի դեկտեմբերի համեմատ, բնակարանների առուվաճառքի գործարքների քանակը Երեւանում նվազել է 54,3 տոկոսով, իսկ նախորդ տարվա հունվարի համեմատ` 47,2 տոկոսով:

Բնակարանների շուկայական միջին գները այս տարվա առաջին ամսին, դեկտեմբերի համեմատ նվազել են 3,1 տոկոսով: Ըստ համայնքների, Երեւանում բնակարանների 1 քմ մակերեսի միջին շուկայական գները այսպիսին են եղել.

Աղյուսակից երեւում է, որ միայն Կենտրոնում եւ Էրեբունիում են անշարժ գույքի գները աճել, իսկ մնացած բոլոր համայնքներում դրանք նվազել են: Երեւանի բնակարանների 1 քմ-ի միջին գինը նվազելով` հունվարին կազմել է 283 հազար դրամ:

Մարզերում, բացառությամբ Երեւանի, վաճառվել են 197 բնակարաններ, որոնց քանակը դեկտեմբերի համեմատ նվազել է 50,4 տոկոսով, իսկ 2008-ի հունվարի համեմատ` 47,5 տոկոսով: Միջին գները հունվարին 2008-ի դեկտեմբերի համեմատ նվազել են 2,3 տոկոսով: Երեւանից հետո, ամենաթանկ բնակարանները հունվարին եղել են Ծաղկաձորում, որտեղ 1 քմ գինը կազմել է 172 հազար դրամ: Այդ գինն անփոփոխ է մնացել նոյեմբեր ամսից: Վաղարշապատում (Էջմիածնում) 1 քմ մակերեսի շուկայական գինը կազմել է ավելի քան 163 հազար դրամՙ նախորդ ամսվա 175 հազար դրամի փոխարեն: Աբովյանը երրորդն է բնակարանների 1 քմ-ն 159 հազար դրամ ցուցանիշով: Այստեղ նույնպես նվազում է արձանագրվել նախորդ ամսվա 174 հազար դրամի համեմատ: Ապա գալիս են Իջեւանը, 1 քմ-ն` 152 հազար դրամ, Մասիսը` 146 հազար դրամ, Աշտարակը եւ Ջերմուկը` 143 հազար դրամ:

Հունվարին Հայաստանում գրանցվել է անհատական տների առուվաճառքի 282 գործարք, որից 48-ը` Երեւանում: Մայրաքաղաքում անհատական տների առուվաճառքի գործարքների քանակը դեկտեմբերի համեմատ նվազել է 54,3 տոկոսով, իսկ մարզերում 35,4 տոկոսով: 2008-ի հունվարի համեմատ, անհատական բնակելի տների առուվաճառքի գործարքների քանակը Երեւանում նվազել է 60,7 տոկոսով, իսկ մյուս մարզերում միասին վերցրած` 32,2 տոկոսով:

Անհատական տների միջին շուկայական գները Երեւանում հունվարին դեկտեմբերի համեմատ նվազել են 1,1 տոկոսով: Միջինացվածՙ 250 քմ շինության մակերես եւ 400 քմ տնամերձ ունեցող անհատական տների 1 քմ-ի միջին գներն, ըստ Երեւանի համայնքների, կազմել են.

Մարզերում միջինացված են 200 քմ շինության եւ 1000 քմ տնամերձ մակերեսով անհատական տների գները: Այստեղ միջին գները հունվարին նվազել են 0,1 տոկոսով: Ամենաթանկ անհատական տները Ծաղկաձորում են, 1 քմ-ն` 276 հազար դրամ, որտեղ գների աճի միտումը շարունակվում է: Երկրորդը Աբովյանն է, որտեղ 1 քմ-ն կազմել է 185 հազար դրամ: Երրորդը Վաղարշապատն է, 1 քմ-ն` 177 հազար դրամ, ապա Իջեւանըՙ 154 հազար դրամ: Այնուհետեւ գալիս են Մասիսը (148 հազար դրամ), Նոր Հաճընը (145 հազար դրամ) եւ Աշտարակը (145 հազար դրամ):

Ինչ վերաբերում է հողի շուկային, ապա 2009-ի հունվարին, 2008-ի հունվարի համեմատ, հողերի առուվաճառքի գործարքների քանակը նվազել է 50,2 տոկոսով:

Անշարժ գույքի վարձակալության գործարքների քանակը 2009-ի հունվարին, 2008-ի դեկտեմբերի համեմատ, նվազել է 32,5 տոկոսով, իսկ 2008-ի հունվարի համեմատ` 14,5 տոկոսով:

2009-ի հունվարին անշարժ գույքի իրականացված 404 գրավադրման գործարքներից ընդամենը 13-ն են եղել հիպոթեկային գրավադրման գործարքները: 2008-ի դեկտեմբերի համեմատ, հիպոթեկային գրավադրման գործարքների քանակը հունվարին նվազել է 83,3 տոկոսով, ընդ որում Երեւանում` 82 տոկոսով, մարզերում` 88,2 տոկոսով:

Այսպիսով, կարող ենք արձանագրել, որ անշարժ գույքի շուկայում դադարել է սպասողական վիճակը եւ սկսվել է գործարքների ու գների նվազման շրջանը: Նույնը կարելի է ասել նաեւ հողերի առուվաճառքի, հիպոթեկային գրավադրման եւ վարձակալության ցուցանիշների համար: Այս ամենն, անշուշտ, միջազգային ֆինանսական ճգնաժամի ուղղակի հետեւանքն է: Գների անկման միտումն անշարժ գույքի շուկայում առաջիկա ամիսներին հավանաբար կշարունակվի, սակայն անհավանական է, որ շատ խորանա: Եթե նկատի ունենանք փոխարժեքի տատանումներն ու մշտական մտավախություններն այս կամ այն արժույթի հետ կապված, ապա բավարար չափով խնայողություններ կուտակողներն առաջին իսկ հնարավորության դեպքում դրանցով անշարժ գույք կգնեն: Սա ամենակայուն «արժույթն» է անգամ ճգնաժամային իրավիճակում:

ԱՐԱ ՄԱՐՏԻՐՈՍՅԱՆ