Երեկ ֆուտբոլի Հայաստանի ազգային հավաքականը Տալլինում ընտրական մրցաշարի հերթական խաղում հյուրընկալվել էր Էստոնիայի ընտրանուն: Չորս օր առաջ տեղի ունեցած երեւանյան հանդիպման համեմատ գլխավոր մարզչի պաշտոնակատար Վարդան Մինասյանը երեք փոփոխություն էր կատարել մեկնարկային կազմում: Դարպասում Բերեզովսկուն փոխարինել էր Գեւորգ Կասպարովը, դաշտի կենտրոնում Արթուր Ոսկանյանի փոխարեն խաղում էր Արթուր Եդիգարյանը, իսկ հարձակման գծում Արման Քարամյանին փոխարինել էր էդգար Մանուչարյանը:
Այս անգամ մեր հավաքականը բավական ագրեսիվ խաղ ցուցադրեց եւ ունեցավ դարպասը գրավելու լավ հնարավորություններ: Վտանգավոր էին Արտավազդ Քարամյանի, Էդգար Մանուչարյանի, Հենրիխ Մխիթարյանի, Արթուր Եդիգարյանի հարվածները, որոնցից հետո դաշտի տերերի դարպասապահը փրկեց դրությունը: Էստոնացիներն էլ մի քանի սպառնալից պահ ստեղծեցին եւ խաղավերջում օգտագործեցին Կասպարովի սխալը: Սանդեր Պուրիի հարվածից հետո գնդակը դիպչելով Արզումանյանին, հայտնվեց դարպասում: Այդ գոլն էլ վճռեց հանդիպման ելքը:
ԱՇՈՏ ՀԱՅՐԱՊԵՏՅԱՆ