Հանրապետության պետական բուհերում ընդունելության քննությունների համար դիմում-հայտերն այս տարի կընդունվեն մայիսի 11-ից հունիսի 1-ը ներառյալ: Ինչպես «Արմենպրեսին» տեղեկացրին ԿԳ նախարարությունից, օտարերկրյա քաղաքացիների եւ 2009-ին գարնանային զորակոչից զորացրված դիմորդների փաստաթղթերը կընդունվեն մինչեւ հուլիսի 10: Հայոց լեզու, գրականություն, մաթեմատիկա, քիմիա, ֆիզիկա, կենսաբանություն, հայոց պատմություն, ընդհանուր պատմություն, օտար լեզու (անգլերեն, ռուսերեն, ֆրանսերեն, գերմաներեն, իսպաներեն, իտալերեն, պարսկերեն) եւ աշխարհագրություն առարկաներից դիմորդները կհանձնեն միասնական գրավոր քննություններ, իսկ կենտրոնացված կարգով բանավոր քննություններ կկազմակերպվեն օտար լեզուներից եւ արվեստի, ֆիզկուլտուրայի մասնագիտական առարկաներից: Կենտրոնացված եւ ներբուհական քննությունները կանցկացվեն հուլիսի 15-26-ը: Բուհ ընդունվել ցանկացողներն այս տարի դիմում-հայտ հնարավորություն ունեն ներկայացնելու մեկ կամ մի քանի բուհերի երկու անվճար եւ վեց վճարովի տեղերի, ինչպես նաեւ` առանց տարկետման իրավունքի ուսուցման համապատասխանաբար նշված վճարովի տեղերի համար: Ընդունելության քննությունները կգնահատվեն 20 միավորային համակարգով, իսկ ԳԹԿ կողմից անցկացվող միասնական քննությունների գնահատականները կհամապատասխանեցվեն այս համակարգին: