Նյու Յորքի «Ուեյլ Ռեսիթալ Հոլ» համերգային դահլիճում ապրիլի 4-ին միջազգային մեներգիչների «Օրատորիո» ընկերության կազմակերպած մրցույթի ավարտական փուլում հայազգի Վահագն Հովենցը (Հովհաննիսյան) գրավել է երկրորդ պատվավոր տեղը, տեղեկացնում է «Արմինյն միրոր սփեքթեյթր» շաբաթաթերթի ապրիլի 11-ի համարը: Նրան ընտրել են ընդհանուր 115 մասնակիցներից ավարտական փուլ անցած 9 երգիչների խմբից:
Հովենցը բնիկ հայաստանցի է, սովորել է միջազգային ճանաչման արժանացած սոպրանո Գոհար Գասպարյանի դասարանում եւ որպես գլխավոր մեներգիչ հանդես է եկել Օհան Դուրյանի եւ Լորիս Ճգնավորյանի ղեկավարած համերգներում: Կատարումներով շրջագայել է Ռուսաստանում, Գերմանիայում, Ֆրանսիայում, Իտալիայում, Սիրիայում, Ավստրիայում, Մոնակոյում եւ Մ. Նահանգներում:
Վերոնշյալ մրցույթում նա դաշնակահարուհի Լինդա Հոլի ընկերակցությամբ կատարել է Դվորժակի եւ Պուչչինիի ստեղծագործություններից:
Մրցանակը նրան է հանձնել Նյու Յորքի «Օրատորիո» ընկերության նախագահ Ռիչարդ Փեյսը: Ժյուրիի կազմում են եղել Նյու Յորքի խոշորագույն երաժշտական կազմակերպությունների ականավոր տնօրեններ եւ դիրիժորներ:
Հ. Ծ.