Հայաստանի շախմատի ֆեդերացիան եւ շախմատային ակադեմիան արդեն երկրորդ անգամ միջազգային մրցաշար են կազմակերպում Գյումրիում` նպատակ ունենալով նպաստել քաղաքում ու մարզում իմաստուն խաղի առավել ակտիվ զարգացմանը: Առաջին նման մրցաշարն անցկացվեց անցյալ տարի եւ քաղաքի համար շախմատային տոն դարձավ: ՖԻԴԵ-ի դասակարգմամբ 11-րդ կարգի երկրորդ մրցաշարը կմեկնարկի այսօր, 10 շախմատիստների մասնակցությամբ: Զուգահեռաբար կանցկացվի նաեւ մարզի պատանեկան շախմատային փառատոն ավելի քան 200 մասնակիցներով:
Միջազգային մրցաշարին մասնակցության հայտ են ներկայացրել գրոսմայստերներ Արա Մինասյանը, Գեւորգ Հարությունյանը, Հրայր Սիմոնյանը (Հայաստան), Դավիթ Հարությունյանը, Թամազ Գելաշվիլին (Վրաստան), միջազգային վարպետներ Արթուր Չիբուխչյանը, Դավիթ Քալաշյանը, Ռուսաստանը ներկայացնող Պավել Պանկրատովը եւ ղազախստանցի Ռինատ Ջումբաեւը, պատանի շախմատիստ Ռոբերտ Հովհաննիսյանը:
Մրցաշարի հանդիսավոր բացումը տեղի ունեցավ երեկ, «Հոկտեմբեր» կինոթատրոնի դահլիճում: Նախատեսված ինը տուրերի հանդիպումները կկայանան Վարդան Աճեմյանի անվան թատրոնի դահլիճում եւ կավարտվեն մայիսի 31-ին:
Գ. Մ.