Ղարաբաղի իշխանությունները մերժել են Շուշիի առանձնակի գումարտակի հրամանատար Ժիրայր Սեֆիլյանի դիմումըՙ քաղաքացիություն շնորհելու խնդրանքով, հաղորդում է «Ազատություն» ռադիոկայանը: 2004-ից ի վեր Ժիրայր Սեֆիլյանը նույն հարցով գրեթե ամեն տարի դիմում էր Հայաստանի իշխանություններին եւ անփոփոխ մերժում ստանում: Այս տարվա հունիսին Սեֆիլյանը դիմել է Լեռնային Ղարաբաղի իշխանություններին եւ կրկին մերժում է ստացել: «Հաշվի առնելով, որ Ղարաբաղում դեռեւս ընդունված չէ երկքաղաքացիության օրենքը, հետեւաբար դա, իհարկե, խոչընդոտ է, «Ազատություն» ռադիոկայանին փոխանցել է Լեռնային Ղարաբաղի նախագահի մամուլի քարտուղար Դավիթ Բաբայանը : Նա հավելել է, որ օրենքը ընդունվելուց հետո հարցը կրկին կքննարկվի: Հարցին, թե ինչո՞վ է պայմանավորված, որ Լեռնային Ղարաբաղի նախկին նախագահի հրամանագրերով օրենքի բացակայության պայմաններում, որոշ մարդկանց (օրինակ, Սերժ Ամիրխանյանին) քաղաքացիություն է շնորհվել, Դավիթ Բաբայանը պատասխանել է. «Ամիրխանյանը երկար տարիներ այստեղ բնակվում էր, զբաղեցնում էր պատասխանատու պաշտոններ (նախարարի պաշտոններ էր զբաղեցնում): Հետեւաբար, գուցե բնակեցման խնդիրներ կային... Չնայած տեղյակ չեմ խնդիրներին»: