Մայր աթոռից հաղորդում են, որ հուլիսի 8-ին Ամենայն հայոց կաթողիկոսն ընդունեց ուխտավորաբար Հայաստանում գտնվող Պավիա քաղաքի (Իտալիա) արքեպիսկոպոսարանի ճեմարանի սաներին` Պավիայի արքեպիսկոպոս գերապատիվ Ջովաննի Ջուդիչի գլխավորությամբ: Վեհափառ հայրապետը, ողջունելով կաթոլիկ երիտասարդների այցը հայոց հոգեւոր կենտրոն, անդրադարձավ Ամենայն հայոց Կաթողիկոսության եւ Վատիկանի միջեւ առկա ջերմ հարաբերություններին, նկատելով, որ, իբրեւ վաղվա հոգեւորականներ, այսօրվա ճեմարանականները ապագայում իրենց դրական մասնակցությունը պիտի ունենան այդ հարաբերությունների առավել խորացմանը: Վեհափառ հայրապետը մասնավորապես վերհիշեց 2001-ին Հռոմի պապ Հովհաննես Պողոս Բ-ի այցելությունը Հայաստան, ապա եւ անցած տարվա իր այցը Հռոմ, որի ընթացքում, ի պատիվ երկու եկեղեցիների ջերմ հարաբերությունների, Հռոմի Ս. Վլաս եկեղեցին տրամադրվեց հայ համայնքին` ծիսակատարությունների համար: