Հուլիսի 25-26-ին մայրաքաղաքի «Դինամո» մարզադահլիճում Հայաստանում առաջին անգամ տեղի կունենա կարատեի «Կուբոտայի գավաթի» միջազգային մրցաշար, որին բացի հայ կարատեիստներից, կմասնակցեն նաեւ ԱՄՆ-ի, Լեհաստանի, Հնդկաստանի, Ուկրաինայի, Բելառուսի, Իրանի, Վրաստանի եւ Արցախի թիմերը: Հայաստանն այդ մրցումներում կներկայացնեն մոտ 300 մարզիկ-մարզուհիներ, մյուս երկրներից մասնակիցների թիվը կկազմի 60-65 հոգի: Ըստ Հայաստանի կարատեի ազգային ֆեդերացիայի նախագահ Գրիգոր Միքայելյանի, մասնակիցների քանակն ավելին կլիներ, եթե ֆինանսական ճգնաժամը չխանգարեր: Շատ երկրներ այդ պատճառով չեն կարող ժամանել Հայաստան:
Մրցաշարի անցկացման կապակցությամբ առաջին անգամ Հայաստանում է հանրահռչակ կարատեիստ, սեւ գոտի 10-րդ դան, գոսոկուրյու ոճի եւ կարատեի միջազգային ընկերակցության հիմնադիր, ճապոնացի Սոկե Տակայուկի Կուբոտան, որն իր գործընկերների, Գրիգոր Միքայելյանի, Հայաստանի կարատեի ազգային ֆեդերացիայի պատվավոր նախագահ, հայ առաքելական եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանի հետ երեկ հանդիպել է լրագրողներին: Նա նշեց, որ հայ կարատեիստները բավական բարձր որակավորում ունեն եւ մշտապես հաջող մրցելույթներ են ունենում միջազգային մրցաշարերում: Կուբոտան շնորհակալություն հայտնեց հրավերի համար եւ հույս ունի այս մի քանի օրերի ընթացքում լիարժեք ծանոթանալ Հայաստանին:
Սոկե Տակայուկի Կուբոտան ծնվել է 1924-ին ճապոնական Կումամոտո քաղաքում: Վաղ հասակից զբաղվել է կարատեով: 13 տարեկանում տեղափոխվել է Տոկիո եւ հմտացել է ոչ միայն կարատեի, այլեւ արեւելյան մարտարվեստի մյուս ոճերում: Նա աշխարհի 59 երկրներում կարատեի դպրոց ունի հիմնած: Ավելի քան 60 տարվա քրտնաջան աշխատանքի եւ նվիրվածության շնորհիվ նա կարողացել է աշխարհի շատ երկրներում մասսայականացնել կարատեի գոսուկուրյու ոճը: Մարտարվեստում ունեցած բացառիկ գիտելիքների շնորհիվ Սոկեն հրավիրվել է նկարահանվելու եւ որպես տեխնիկական խորհրդատու է եղել հոլիվուդյան գրեթե 300 ֆիլմերում եւ հեռուստածրագրերում:
Այսօր ողջ աշխարհում անցկացվում են կարատեի միջազգային ընկերակցության եւ գոսուկուրյու ոճի աշխարհի ու Եվրոպայի առաջնություններ ի պատիվ կարատեի լեգենդար վարպետ Սոկե Տակայուկի Կուբոտայի: Երեւանյան մրցաշարն էլ դրանց շարքին է դասվում:
ԱՇՈՏ ՀԱՅՐԱՊԵՏՅԱՆ