Հայաստանի ֆուտբոլի ֆեդերացիայի արտոնագրման կոմիտեի նիստում միաձայն որոշվել էր Երեւանի «Արարատին» զրկել առաջնությանը մասնակցելու իրավունք ընձեռող արտոնագրից: Ըստ արտոնագրման բաժնի պետ Առնո Սարգսյանիՙ «Արարատ» ֆուտբոլային ակումբը խախտել է ՀՖՖ ակումբների արտոնագրման ուղեցույցի համապատասխան հոդվածի կետերը: Ըստ դրանց, ազգային արտոնագիր ստանալու համար յուրաքանչյուր ակումբ պետք է առնվազն 4 մանկապատանեկան թիմ ունենա, որոնք մասնակցեն ՀՖՖ հովանու ներքո անցկացվող մանկապատանեկան առաջնություններին:
Ընթացիկ մրցաշրջանում «Արարատը» մանկապատանեկան առաջնություններում ներկայացնում էին 5 թիմեր, որոնցից 3-ըՙ «Արարատ-95»-ը, «Արարատ-96»-ը եւ «Արարատ-97»-ը ՀՖՖ կարգապահական կոմիտեի որոշմամբ հանվել են առաջնությունիցՙ երկու եւ ավելի անգամ մրցավայր չներկայանալու պատճառով: Ուստի «Արարատը» զրկվել էր արտոնագրից: «Արարատը» 5 օրվա ընթացքում կարող էր բողոքարկել որոշումը:
Եվ այսպես, «Արարատը» կանգնած էր առաջնությունից հեռացվելու վտանգի առջեւ: Բարեբախտաբար, երեկ կայացած ՀՖՖ գործկոմի նիստում անդամները եւս մեկ անգամ ընդառաջեցին «Արարատին»ՙ հնարավորություն ընձեռելով թիմին շարունակելու ելույթներն առաջնությունում:
ԱՇՈՏ ՀԱՅՐԱՊԵՏՅԱՆ